Sant Jaime o Mayor, u Sant Jayme seguntes s’escriviva en l’aragonés meyeval, Santo Patron d’as Espanyas, fue un d’os primers apóstols d’o nuestro Sinyor Gesu Cristo, igual como lo suyo germano Juan.
Seguntes reconta a tradicion, dimpués d’o Pentecostés —ent’a part de l’anyo 33— l’apóstol
venió ta Hispánia á cumplir-hie a suya mision evangelizadera. Fue altalle, o dos de ginero de l’anyo 40, quan a Santa Virgen Maria se l’apareixió —en carne mortal— en a ciudat de Zaragoça. Sant Jaime e siete d’os suyos primers disciplos devanton una chiqueta capiella en o mesmo puesto an que a Mair de Dios los heva animato á siguir o suyo quefer misionero e heva participato á Sant Jaime o Suyo deseyo d’estar arroclata per toz os apóstols o dia d’a Suya Asuncion. Tornato pues ta Gerusalem, Sant Jaime bi fue martiriciato, per orden d’o rei Herodes Agripa I, enta l’anyo 43. D’alcuerdo con a tradicion, os suyos disciplos levon o suyo cuerpo per lo mar Mediterránio e siguindo a costa atlantica plegon en Galícia, an que lo interron en Iria Flavia. Allí o bispe Teodomiro lo trobó en o sieglo IX. Naixió asinas o Camin de Sant Jaime, una d’as fitas d’a Fe e d’a cultura europea.
Ixa devocion popular se veyó refirmata en a Espanya medieval per a miraglosa aduya que l’aparicion d’o santo proporcionó á o rei Ramiro I d'Astúrias en a victória devant d’os moros en Clavijo en l’anyo 844. Dende alavez, a invocación á Sant Jaime en a reconquista ye contina. No cal sique ricordar o chilo “Santiago, y cierra España” con que as tropas cristianas entravan en batalla, aconsiguindo victórias tan heroicas como a d’as Navas de Tolosa de l’anyo 1212. No ye d’almirar que a imagen de Sant Jaime Matamoros se continás fendo servir en a luita d’o cristianismo cuentra l’islam, per eixemplo en as guerras cuentra os turcos durant o sieglo XVI.
Tamien hue cal demandar l’aduya d’o Santo Patron en a luita cuentra toz os mals que nos menaçan. Tamien hue ye menister tener present a figura d’o Miles Christi.
