lunes, 28 de marzo de 2011

A indignidat d'as Cortes

O pasato viernes, as Cortes d’Aragon zarron a suya puenda de sesions per esta legislatura. No sé si belun se’n havrá apercibito. No pas yo, que no los trobo á faltar. Igual como no trobo á faltar á ixe president autonomico, que fa de secretário de quimisió á Madrid, e ya no exerze de caporal d’Aragon. No sé ta qué pagamos os bogals sueldos de tota esta gentota que o suyo treballo ye prescindible de tot.
O caso ye que o pasato viernes as Cortes d’Aragon rematon a legislatura, e cómo lo fiçon? Pos aprevando una lei sobre ixo que beluns claman muerte digna, encara que mica aduye á la dignidat d’a persona ni á l’exercício d’a prautica sanitária.
Talment as cortes d’Aragon no sabevan que o sabado yera o dia internacional d’a vida e que, per ixo mesmo, b’havió 80 concentracions en Espanya, tamien en Aragon, an que cientos de mils de personas desigiemos o respecto á o primero d’os dreitos humanos. Talment as Cortes d’Aragon tampoco no sabevan que as familias aragonesas son as que pagan més impuestos de tota Espanya. A cifra no ye chiqueta: una família meya que tienga rentos d’o treballo de dica 44.000 euros, fillos chiquez e pague hipoteca caixará d’impuestos 3.540 euros, o que ye 2.910 euros més que a mesma família en Castiella e Lion. Pero claro, sobre ixo no legislan pas as Cortes nuestras, a prioridat ye o dreito á la muerte digna, no pas a proteccion d’a família.
Tampoco no legislan ta millorar a sanidat. Á las suyas sinyorias no se les da mica que as nuestras listas d’aspera no faigan que creixer, que, dende que ye l’autonomia qui s’ha feito cargo d’as transferéncia de sanidat, a calidat de toz os sevícios no faiga que empiorar. Ni b’ha meyos ni b’ha personal, pero sobre ixo no legislan pas as Cortes nuestras, a prioridat ye o dreito á la muerte digna, no pas á la sanidat digna.
O pasato viernes, as Cortes d’Aragon zarron a suya puenda de sesions per esta legislatura. Asinas per lo menos dixaran d’emporquiar, encara que només siga que bels meses, o nombre d’una institucion que ye milenária e que os actuals deputaus han convertito en un circo; un circo indigno e caro.

miércoles, 23 de marzo de 2011

O empanadico de Morales

A realidat supera la ficcion: a foto no ye pas mica montage. Evo Morales en estato puro. Evo Morales esprituato per Dalí. Evo Morales festellando no sé sabe qué festividat aborigen. Perque a fiesta d’a Pachamama, u d’a Mair Tierra, u de cómo diaples la quieran clamar, se perdió fa sieglos e ya no se sabe pas ni qué ni cómo se hi celebrava.
Pero ixo rai. En puesto de vivir a Quaresma e parar a Pasqua, que buena honra le faria, aquí bi ye Evo Morales: fendo de nuevas o rediclo.
Diz que a culpa ye d’as enqüestas, que si fa tasament un anyo amonstravan un 70% de refirme á la suya gestion, agora os satisfeitos con as politicas moralianas no plegan en o 38%. En una situacion asinas, qualsiquier estadista sabe que si cal fer l’índio, pos se fa. Realpolitik me pa que le dicen.
Con tot, qualcosa cal reconeixer-le á Evo: no caye tan baixo como Sarkozy u Obama, que quan as enqüestas los castigan o que fan ye una guerra. E més luen encara en ye de Rodríguez, que ixe fa la guerra e o rediclo; tot de vez e con parellana torpeça. E nusatros, tanimientres, veyendo cómo pleve.

lunes, 14 de marzo de 2011

Investigacions criminals


En un nuevo eixemplo de cómo a cultura d’a muerte empesta totas as árias d’a nuestra dolenta sociedat, o Instituto Universitario de Biocomputación y Física de Sistemas Complejos (BIFI) ha aconseguito a primer autorizacion feita en Aragon ta investigar  
con celulas mairs procedents d’embrions humanos. En estos tiempos asesinadors, no faltan bels investigadors que, con o refirme de muitos politicos, afirman que ye posible matar directament embrions de sers humanos como si no fuesen que ogetos d’investigacion, e nos fan a toz complices d’ixos asesinatos á traviés d’o uso de fondos publicos adedicatos á ditas investigacions.
Dica agora, en Aragon no se permitiva fer servir celulas quitatas d’embrions humanos ta garra mena d'investigacion. A prohibicion, logica de tot, no privava que, actualment, b’haiga en Aragon 14 progectos que treballan con celulas mair adultas que se extrayen, per eixemplo, d’a sangre de cordon umbilical u d’o teixito adiposo, sin estricallar garra vida. A naturaleça nos ofreix amplos recursos ta aconseguir progresar en os tractamientos medicos sin crepar as normas morals. Per eixemplo, as celulas mair de teixitos adultos e a sangre d’o cordon umbilical, emplegatas, como s’ha dito, dica agora en a nuestra region, tienen muitas més posibilidaz d’investigacion que no se creyeva.
Enatiça sociedat que esfiende que a fin justifica os meyos e oblida que l’embrion ye un ser humano; que, dende a concepcion enta devant, un embrion ye tan miembro d’a espécie humana como qualsiquiera de nusatros; que tiene l'adotacion completa de gens humanos e se desenvolica d’una traça que ye exclusiva d’os sers humanos.
O futuro fa miedo perque o present fa fástio.

jueves, 3 de marzo de 2011

5 de março, qué celebraz?

O cinco de março de 1838 Juan Cabañero y Esponera, infançon d’as Tierras Baixas d’Aragon e militar carlista, a o mando de dos mils infants e trescientos cavallos, prevó de conquistar a ciudat de Zaragoça, encara que, bien lo sabeva el, a plaça yera esfendita per tropas muito superiors en numbro e armamento. Contava con l’aduya d’os partidários carlistas d’a ciudat e o factor sorpresa. Con tot e con ixo, como yera de dar, l’accion no tenió mica exito e as tropas carlistas estion derrotatas. Per muito justa que seiga a tuya causa, si no tiens que viellos mosquetons, malament puedes luitar cuentra baterias de canyons.
O cinco de março ye festivo a Zaragoça. Fa anyos sacon d’o calandário a festividat d’o 18 de juliol. Nos decivan que no se deveva festellar a muerte d’uns espanyols a mans d’atros espanyols. Pareix que ixe argumento no sirve pas quan os muertos, os vencitos, son carlistas; prou sabemos qué historica ye a memória de bellas gentotas.
O cinco de março ye festivo a Zaragoça. Con o patrocínio d’o concello d’a ciudat, buena cosa de gent s‘ençorraran dica o coma etilico, s’enreligaran en pecinas (mesmo asesinatos b’ha haviu atros anyos) e s’esvolustraran como tocinos en as toneladas de vasuera que arrullaran en uno d’os polmons d’a ciudat (veyez una foto de cómo dixon o Parque d’Orient l’anyo pasato). As arcas monecipals malfurriaran bogals os diners d’os impuestos; ademés, ye anyo electoral
O cinco de março ye festivo a Zaragoça. Fa 73 anyos, bels cientos de valients supon luitar, e morir, con honor en esfensa d’os suyos ideyals. Hue, bels mils de capinos feran botellaz, mientres esberlecan e gomecan e pixan satisfeitos n'o mobible urbano, entre as risiquetas megas d'os caporals politicos.
O cinco de março ye festivo a Zaragoça. Eloqüent envista de cómo l’heréncio liberal ha estricallato a dignidat d’a nuestra pátria.