domingo, 27 de enero de 2013

As cosas claras

Diz que una imagen ye millor que no milenta parolas; talment sí. D'o que sí que soi seguro ye de que una accion ye millor que no milenta imágens, millor que no un millon de parolas. Que lo ricuerden es que nos guviernan. Que lo ricordemos nusatros per si es que nos guviernan nunca l'olbidasen.



jueves, 24 de enero de 2013

Handel, Schubert e Maurice André

Bi sé que hue havrí á escrivir sobre a indecéncia d’o parlamento catalan, pero ni a indecéncia d’as cortes regionals —de totas as cortes regionals— ye una novedat ni o tema mereix més comentários que os ya feitos per atras bitacoras La Comedia Humana, per eixemplo.
Asinas que yo ascuito á Handel —naixito Händel— en a beroya versión que Maurice André, o millor interprete de trompeta barroca d’a história, nos regaló ta conuerto de l’alma nuestra:
Dimpués, podez veyer á o mayestro en este vídio interpretando l’Ave Maria de Schubert con ixa humildat que solo que os grans génios tienen: vinclo.

sábado, 19 de enero de 2013

Malotias

Quan repaso as zagueras doscientas anyatas d’a história d’as Espanyas, á sovent me se’n vien t’a capeça una maçada de Marie von Ebner-Eschenbach:
Nicht tödlich, aber unheilbar, das sind die schlimmsten Krankheiten.
E ye bien cierto: no pas as terminals, sino as incurables, ixas son as piors malotias.
Malotias como lo liberalismo u o marxismo —a mesma vasuera hi son—, como lo nacionalismo u l’ateïsmo fa ya sieglos que secuten a Pátria nuestra sin que hi metamos remédio. Chiquetas doléncias, en primeras, que son itas creixendo dica fer-sen patologias cronicas que l’alma nuestra —que mesmo lo cuerpo nuestro— empestan e podreixen.
E asinas, como lo dolent que acomoda a suya vita á ixas molestias chicotas —que per cada dia menos chicotas hi son— en puesto de trobar una solucion finitiva e límpia á os suyos mals, hemos dixato que toz os enemigos d’a Tradicion e a eséncia d’a Nacion condicionen o nuestro present, menacen o nuestro futuro e rescrivan o nuestro pasato. E asinas, como lo dolent que no gosa enfrontinar-se á la suya malotia, hemos dixato que ixos mals —fillos d’o modernismo materialista— s’acoflen en a nuestra vita e la enverenen dica fer-la quasi insoportable.
Altalle, e si lo sapemos prou, per qué no hi femos ni meya?

lunes, 14 de enero de 2013

Mártirs altoaragoneses


Seguntes ha confirmato a Conferéncia Bispal Espanyola, bi ha quince altoaragoneses en a lista de 527 mártirs que fuen vitimas de l’ódio religioso en as Espanyas entre os anyos 1934 e 1937. D’els 3 yeran bispes e toz os atros mosens, religiosos e laicos a es que beatificará a Ilésia Catolica o proximo 27 d’octubre en Tarragona. Beluns son encara pendients d’a revision per a comision de cardenals que se reunirá en abril e d’a firma d’o decreto per lo Papa Benedicto XVI.
En a lista hi son Honorato Suárez e Anselmo Palau (Torres de lo Bispo), Mariano Sierra (Alqueçra), Fernando Salinas (Poçan de Vero), Aurelio Noix (Pueyo de Marguillen), Lorenzo Santolaria (Torres d’Alcanadre), Lorenzo Sobrevía (Uesca) e Vicente Burrel (Juseu), que yeran parti d’a comunidat benedictina d’o santuário d’O Pueyo, ademés de José Jordán Blecua (Aflor) e José Nadal Guíu (Belloc), coneixitos como os “curetas de Monçon”, asinas que aproveito ta recomendar-tos o libro El Cinca baja teñido de sangre. Los "curetas" de Monzón y los Gasco de Sena, camino de la glorificación martirial cristiana de Jacinto Peraire Ferrer.

miércoles, 2 de enero de 2013

Cuentr'a usura

Á sovent me pregunto per qué buenacosa d’a Ilésia, —igual laicos como mosens e gerarquia— pareixen haver olbidato que a usura ye un pecato. Me pregunto altalle per qué es nuestros bispes no encapeçan a luita cuentr’o liberalismo que nos arruina economicament. Talvegata seiga perque, dinantes que economicament, o liberalismo nos ha arruinato moralment. Per ixo en bellas cien anyadas yéranos pasatos d’a  Rerum Novarum (1891) d’o papa Lion XIII —usura vorax, quae non semel Ecclesiae judicio damnata, tamen ab hominibus avidis et quaestuosis per aliam speciem exercetur eadem— t’a Sollicitudo rei socialis (1987) de Juan Pablo II, an que a usura ya ni se hi menciona.
Bien se vale que —tamien en este afer— Benedicto XVI pareix querer desfer falsas interpretacions doctrinals e, con prudéncia pero con firmeça, torna á dixar claras as cosas. Asinas, per eixemplo, n’a suya zaguer encíclica, Caritas in veritate (2009), nos ricordava que:
quod ad debiliores plebis partes attinet, ab usurae aut desperationis discrimine eripiendas. Debiliores homines de usura arcenda sunt docendi. 
Ye dicir, os sectors més vulnerables d’a poblacion han d’estar protegitos d’a menaça d’a usura e a desesperacion e os més febles han d’estar educatos ta esfender-sen d’a usura. Aspero que toz os nuestros bispes se hi faigan ya perque aspero que beluns d’os nuestros bispes dixen de parixer miembros d’a egecutiva d’o Partido Popular, ixe partito que ademés de l’alborto u a sodomia favoreix a banca que nos afoga con a suya usura.