Farto

E Farto de tot. Farto de que a un ninon de cinco anyez, en un colégio de Sitges, le fiquen un punto royo en o suyo expedient per charrar espanyol en o pátio de recreu. Farto de que a consellera d’Educacion d’a Generalidat, Irene Rigau, diga que a senténcia d’o Tribunal Constitucional que reconeix, ya caleva, o dreito d’os pairs á escolarizar en a luenga oficial que més s’estimen, espanyol u catalan, á os ninos d’a region no la cumpliran pas.

Farto de que o consellero de Cultura d’a Generalidat catalana, Ferran Mascarell, diga que sin dialogo no b’havrá solucion á o tema de l’arte sacro que enfrontina á las diocesis de Balbastro-Monçon e de Lerida per a propiedat de bellas cien pieças artisticas.
En una entrevista á Catalunya Informació ha dito o consellero: «Sin dialogo no b’havrá solucion. Que s’haiga creato un conflicto politico á partir de l’arte ye patarieco, perque l’arte ha á servir ta unir esmos, no ta deseparar-los. Asperamos que dimpués d’as esleccions proximas en Aragon podamos emprencipiar á dialogar. Con dialogo esto rematará; si no, continará igual como agora ye».

Se’n olbida ixe sinyor que no b’ha garra conflicto e que a qüestion ye clara de raso. Se’n olbida de que o Vaticano ha ordenato, buenacosa de vegatas, á o bispau de Lerida que torne 113 pieças d’arte aragonesas que retien en o suyo poder, e que ye a Generalidat qui no da o suyo permiso.

Soi Farto. Farto de tot. Farto de que o guvierno catalan no respecte pas a justícia, ni sisquiera a legalidat, ni sisquiera o sentito comun. Mala cendella los creme.

Refusato un recurso cuentra a Lei de Luengas

O Tribunal Constitucional no ha almitito á tramit o recurso presentato per once concellos aragoneses, toz els d’a zona oriental, cuentra a Lei de Luengas d’Aragon. Entre as suyas raçons sinyala que no son establitas as árias d’emplego d’as luengas e que encara no se sabe si os lugars que presenton o recurso -Fayón, Fornoles, Fraga, La Codoñera, La Ginebrosa, La Fresneda, Lascuarre, Nonaspe, Torre del Compte, Valderrobres e Aiguaviva- veyeran afectata as suyas competéncias locals, como alegavan els en o recurso, per a demandita Lei.
Manimenos, o pleno d’o Constitucional considera que si se vulnerás l’autonomía local, se podria recurrir deban d’a jurisdiccion contencioso-alministrativa. Asinas, a no almision d’o recurso no zarra definitivament a posibilidat de que a Lei seiga inconstitucional.
De seguro que os resultatos d’as esleccions monecipals de mayo e d’as generals d’o 2012 tendran muita repercusion en o conflicto.

Suicídio electoral

De fuera vendran, que de casa te sacaran. Leigan vustés as cifras: quasi 11.000 foranos residents en Aragon podran votar en as proximas esleccions monecipals. E bien se vale que tasament 10.968 d’os quasi 50.000 inmigrants que levan més de cinco anyadas de residéncia legal en Aragon, e que, seguntes a nuestra patarieca e suicida lei tendrian dreito a votar en os comícios locals, han demandato á la Junta Electoral a suya participacion en as votacions, que si lo hesen feito toz, e conforme ye a nuestra demografia, a envista seria enatiça de tot.

D’entre ixos inmigrants, o colectivo més important ye o de rumanos: un 59% d’o total. En a província de Zaragoça, o numbro de rumanos supera o 61,4%. Asinas, en lugars como Ricla u Carinyena b’havrá, si Dios no hi mete remédio, candidatos naixitos en Rumania. Baixo as siglas d’o Centro Democrático Liberal (CDL), en o primer caso, e d’o Partido Ibérico de los Rumanos (Pirum), en o segundo. En Ricla, quasi o 20% d’o censo electoral ye rumano, b’ha 297 electors foranos d’un total de 1.946 vecinos con dreito á voto. Á Carinyena, os foranos representan quasi un 7% d’o total: 167 d’os 2.450 posibles electors no son espanyols. Per ixo, o Pirum ya se hi vei con un jurato d’os 11 d’o concello e sonia con influyir en a color d’o nuevo equipo de guvierno d’o lugar.

En Uesca descuella o caso de Fraga, an que 390 foranos han demandato lo voto (hi son quasi o 4% d’os votadors) e Binéfar (179 inmigrants podran votar-bi). En Teruel, os casos més ixorrontadors son a capital e Alcanyiz, con 177 e 138 inmigrants que hi quieren votar.

Fer-tos cargo cómo será a situacion en bel par més d'esleccions, quan hi voten os que ya hi son, os que hi viengan tanimientres e os fillos que haigan tenito. Lo dito, esto ye un suicídio.

Cabo d'anyo de Costa

Pero per qué se le fan homenages a este personage? Coneixen, encara que per d'encima, as suyas ideyas? Igual me se tiene que lo faigan pasar per progresista; pero que faigan pair de l'aragonesismo a qui quereva afogar meya Montanya ta satisfer a suya baruca agrária no les ne perdono pas.

Aragon no tiene mica memória e asinas nos preva.

Biscarrués e a nueva cultura de l'augua

¿Se’n alcuerdan vustés d’a Expo de Zaragoza? No ye solo que os suyos pavellons, ixos que ivan a emplenar-sen d’oficinas e agéncias oficials ta benefício d’os ciudadanos, no son agora que enruenas e maruenyos. Ya sabévanos que l’acontecimiento seria un atro eixemplo de cómo se malfurrian os nuestros diners en progectos patariecos de tot. Ye tamien que ixa Expo iva a significar un cámbio en l’aproveitamiento de l’augua, una concenciacion sobre a suya importáncia e a nesecidat de fer-la servir ta usos racionals. A nueva cultura de l’augua, ¿se’n alcuerdan? Quan o Plan Hidrologico Nacional e a transcolata d’o Ebro no fevan que repetir-lo como un mantra que nos enfilaria t’a felicidat. A nueva cultura de l’augua, qué bien sona. Pero solo quan conviene, no se trafuquen vustez.

Perque si o tema ye o recreiximiento de Biscarrués (u Yesa u qualsiquier progecto pantanista e criminal), án queda ixa nueva cultura de l’augua? Dice o Centro de Estudios y Experimentación de Obras Públicas, con buena cosas d’informes, que o impacto ambiental d’o pantano de Biscarrués fa inviable de raso lo progecto. Yera de dar, un pantano no ye que un eixemplo d’irracionalidat economica e ecologica. ¿No i yéranos ya toz d’alcuerdo? ¿Alcaso no b’ha alternativas més eficients e, ta caramuello, respectuosas de tot con a naturaleça? Se coneix que no. Ya se i vei qué prestos han blincato furos os de siempre (o Guvierno d’Aragon, quasi toz os partitos politicos e os sindicatos agrários) a esfender o imposible. An que ahiere, ta refusar o PHN e promover a nueva cultura de l’augua, decivan blanco, hue, ta desigir o pantano de Biscarrués e os usos insustenibles d’o preciato liquido, en dicen negro. Negro negriço. Sin mica vergüenya torera (u ecologica).

D’alcuerdo. Bueno ye saber-lo. Perque si casa nuestra se puede afogar per lo bien comun, tamien se puede sacrificar o resto d’Aragon per lo bien comun d’Espanya e o progreso economico d'a mayoria. Asinas que, dende agora mesmo, seré o primero que se manifieste, quan calga e de buen implaz, a favor d’a transcolata d’o Ebro. E será luego. Ya lo veyeran.

De nuevas con a muerte digna

Aquels que no saben vivir dignament s’inventan o dreito a la muerte digna. Igual como s’inventon o dreito a l’alborto. Gentota que no tiene atra basémia que l’ódio e l’asesinato. Gentota que tiene a complicidat d’una sociedat anestesiata.

Hue mesmo, a Junta de Portavoces d’as Cortes d’Aragon debatirá una demanda d’Izquierda Unida ta que faiga garras a creacion d’a ponéncia que estúdie a propuesta legislativa presentata per esta fuerça politica ta reglar o que els claman os dreitos d’a persona en o proceso d’a muerte. Seguntes pareix, e per disgrácia, b’havrá alcuerdo ta aprevar a iniciativa, seis meses dimpués de que as Cortes d’Aragon acceptasen a suya tramitacion.

En os zaguers dias, b’ha havito charraços entre o unico deputato d’IU, Adolfo Barrena, e caporals d’o PSOE ta aligenciar a qüestion. Cal recordar que en o pleno d’o pasato mes de junyo respective a este tema, o PSOE e a CHA refirmon l’almision d’a iniciativa d’IU an que o PAR s’abstuvo e o PP votó en cuentra (podez consultar-ne a dentrata correspondient).

Dende altalle, b’ha havito quatre prorrogas demandatas per as collas ta que s’amplás o periodo de presentacion d’esmiendas. Si a la fin a iniciativa fa garras, Aragon será a segunda region,a l’arreu d’Andalucia, que apreve a eutanásia. Diz que en março, o guvierno d’Espanya en presentará o suyo progecto de lei, a o que clamaran Lei de Cuidaus Paliativos e Muerte Digna. Malament.

Més crimens musulmans cuentra os cristianos

En un atro episódio d’a violéncia genocida cuentra os cristianos en os païses musulmans, un policia asesinó anueit a un pasagero e en firió a atros cinco, toz els cristianos coptos, en dispara-les en un tren aturato en a estacion d’a ciudat de Samalut, en Egipto.

A victima d’a suya enrestita ye un viello de 71 anyos. A suya muller ye una d’as cinco personas feritas en o crimen. Dos d’os feritos son graus.

Manifestants cristianos s’enfrontinon a las fuerças de seguridat devant de l’hespital an que permaneixen ingresatos es cinco feritos, quatre mullers e un hombre, tiroteyatos en a enrestita.

Os manifestants prevon de dentrar en o centro sanitário e os policías les ne privon, per lo que empencipion, siempre seguntes a version oficial, a arrullar piedras a os agents que emburçon a os coptos con gases lacrimogenos.

En este vinclo, en inglés, ixo sí, tenez muita informacion sobre o genocídio cuentra os coptos.

Antiparti en Nigéria, en a redolada d’a ciudad de Jos, continan as enrestitas cuentra os lugars de mayoria cristiana. En esta zaguer ocasión, es muertos son, a lo menos, trece. A violéncia islamista cuentra os cristianos en Nigéria, an que os musulmans son mayoria n’o norte d’o país, no fa sique creixer per cada anyo. Igual como en quasi toz os païses con mayoria islamica.

Mesmo en Europa s’atriven os musulmans a menaçar a las comunidaz de cristianos que, victimas d’o terror islamista, huvon a dixar as suyas nacions.