Quí fues inmigrant

Dende o 2009, bels 30.000 inmigrants son tornatos t’os suyos païses con l’aduya d’o guvierno espanyol (que ni ye guvierno ni, muito menos, ye espanyol, pero ixo seria matéria ta atra entrata). As aduyas no son garra fateça. Ademés, en bi ha tres modalidaz ta que os sinyors inmigrants en triguen a que més honra les faiga.

Asinas, pueden demandar que o guvierno espanyol les pague o billet d’avion e les dé, ademés, 450 euros ta os gastos d’o viage. Como lo guvierno espanyol fa muito que renunció á la esfensa d’as nuestras buegas, estoi que buenacosa d’os inmigrants que s’acullan á esta opcion tornaran ta Espanya decamin, dimpuesas de disfrutar d’unas vacáncias en casa suya con toz os gastos pagatos.

Atra d’as opcions que pueden trigar os sinyors inmigrants ye capitalizar o esquefere. En este caso, antes de viagear t’o suyo país, o guvierno espanyol les caixa o 40% d’o subsídio e, una vegata en casa, o 60% restant. De nuevas, e como lo guvierno espanyol fa muito que renunció á la esfensa d’as nuestras buegas, estoi que buenacosa d’os inmigrants que s’acullan á esta opcion tornaran ta Espanya decamin, dimpuesas d’haver malfurriato es nuestros diners en qualsiquier concieto.

Con tot, a opcion que més s’estiman os sinyors inmigrants ye a tornata productiva. Con esta modalidat, o guvierno espanyol da á o sinyor inmigrant 1.500 euros ta que amonte bel negócio en o suyo país. De nuevas, e como lo guvierno espanyol fa muito que renunció á la esfensa d’as nuestras buegas, estoi que buenacosa d’os inmigrants que s’acullan á esta opcion tornaran ta Espanya decamin, dimpuesas d’haver dixato bel familiar á cargo d’o negócio que han feito con os nuestros impuestos. Una vegata en Espanya, ya trobaran atras aduyas, que aquí nos sobran os dinerez.

Vacáncias subvencionatas, dreito á un subsídio d’esquefere á la carta, diners ta amontar un negócio an que més t’estimes… quí fues inmigrant e no un treballador autonomo espanyol sin vacáncias pagatas, sin un euro d’esquefere, sin garra aduya —ni sisquiera acceso a un credito— ta salvar un negócio real. Un negócio que da treballo encara e paga per cada dia més impuestos. Impuestos ta esto. E ta atras muitas cosas muito piors.

Suicídio electoral

De fuera vendran, que de casa te sacaran. Leigan vustés as cifras: quasi 11.000 foranos residents en Aragon podran votar en as proximas esleccions monecipals. E bien se vale que tasament 10.968 d’os quasi 50.000 inmigrants que levan més de cinco anyadas de residéncia legal en Aragon, e que, seguntes a nuestra patarieca e suicida lei tendrian dreito a votar en os comícios locals, han demandato á la Junta Electoral a suya participacion en as votacions, que si lo hesen feito toz, e conforme ye a nuestra demografia, a envista seria enatiça de tot.

D’entre ixos inmigrants, o colectivo més important ye o de rumanos: un 59% d’o total. En a província de Zaragoça, o numbro de rumanos supera o 61,4%. Asinas, en lugars como Ricla u Carinyena b’havrá, si Dios no hi mete remédio, candidatos naixitos en Rumania. Baixo as siglas d’o Centro Democrático Liberal (CDL), en o primer caso, e d’o Partido Ibérico de los Rumanos (Pirum), en o segundo. En Ricla, quasi o 20% d’o censo electoral ye rumano, b’ha 297 electors foranos d’un total de 1.946 vecinos con dreito á voto. Á Carinyena, os foranos representan quasi un 7% d’o total: 167 d’os 2.450 posibles electors no son espanyols. Per ixo, o Pirum ya se hi vei con un jurato d’os 11 d’o concello e sonia con influyir en a color d’o nuevo equipo de guvierno d’o lugar.

En Uesca descuella o caso de Fraga, an que 390 foranos han demandato lo voto (hi son quasi o 4% d’os votadors) e Binéfar (179 inmigrants podran votar-bi). En Teruel, os casos més ixorrontadors son a capital e Alcanyiz, con 177 e 138 inmigrants que hi quieren votar.

Fer-tos cargo cómo será a situacion en bel par més d'esleccions, quan hi voten os que ya hi son, os que hi viengan tanimientres e os fillos que haigan tenito. Lo dito, esto ye un suicídio.

Disaparixer no ye o mesmo que creixer

Seguntes o estúdio 'Proyección de la Población de España a Corto Plazo 2010-2020' feito per lo Instituto Nacional de Estadística, a poblacion aragonesa creixerá un 4,3 per ciento en os proximos diez anyos, un percentage superior a la meya nacional, que lo ferá en un 2,7 per ciento. A província de Teruel ye a unica d’entre as aragonesas an que i havrá un creiximiento vegetativo negativo.

Asinas, aseguran els, en Aragon a poblacion puyará en 56.977 habitadors. Pareix un dato ta l’asperança, pero no. O mesmo estúdio sinyala que naixeran menos aragoneses que no mueran. Cómo ye posible altalle ixe creiximiento nunciato? Per a emigración, prou que sí. E ixo ye o grau, perque no ye solo que a poblacion aragonesa no creixerá pas, ye que a población aragonesa, de siguir asinas, disaparixerá. E antes que no nos creyemos. Perque o grau, o criminal, ye que son os mesmos partitos, os mesmos guviernos, os que, como parti d’una estratégia ta destruyir a nuestra sociedat e fer posible o suyo proyecto d’ingenieria social, han favoreixito una inmigracion incontrolata de tot, e, de vez, han empentato e refirmato o genocídio de l’alborto e refusato qualsiquier plan ta fer creixer a nuestra natalidat. Tot con o unico ogetivo de fer disaparixer, no solo que moral, tamien fesicament, a nuestra civilización.

O PSOE, a burka e os crucifixos

Ahiere, en o senato, o PSOE tornó a fer buena preva d'a suya indecéncia intelectual e moral; qualcosa que, ye verdat, ya no almira a garra gent.

Sí, os mesmos que quieren sacar os crucifixos d'os espácios publicos s'oposon, sin tritolar sisquiera, a que se i viede a burka. Els, que s'emplenan a boca charrando d'a dignidat d'a muller.

A senadora Patricia Hernández sayó d'esfender a suya vergonyosa posicion con intervencions como: "nuestro grupo está más por el diálogo con las administraciones y comunidades musulmanas, con la educación desde el respeto y la igualdad, con las acciones de sensibilización, y con el fomento de la integración".

Án ye ixe respecto quan se tracta, per eixemplo, d'o crucifixo, un simbolo cristiano, tradicional en as Espanyas dende fa més de 2000 anyos, e que no altroxa a dignidat de dengun, sino tot o contrário?

Pero a culpa ye nuestra. A veyer si os catolicos emprencipiamos a reaccionar. E reaccionamos en traças e como cal.

¿Ye marxista o PP?

These are my principles, and if you don't like them... well, I have others. A frase, prou que sí, ye de Groucho Marx e qualcosa parellana, estos son os mios prencípios e si no le fan goi… bueno en tiengo atros, pareix que ye o lema d’o PP. Pero claro, Groucho Marx se feva o preu fendo redir mientres que o PP ye un partito politico e, doncas, havria a tener, si no prencípios, sisquiera qualque ideologia.

No ye o caso. A o PP igual se le da demandar agora a cadena perpétua como haver firmato dinantes un pacto per a justícia —quan tenevan mayoria absoluta, no s’olbide pas— que legitimava l’actual estato de permisividat —u talment caldria parlar millor de complicidat— con o delicto que agora tanto cretican. E o mesmo que fan respective a la justícia lo fan con tot.

Asinas, José María Áznar tiene a barra d’ir ta una manifestacion cuentr’o progecto de lei d’alborto d’o PSOE quan os suyos guviernos amparon l’asesinato de decenas de mils d’inocents sin que ixos crímens se le dasen mica ni movés un dido ta fer disaparixer a lei que lo permitiva.

Asinas, Rajoy diz que derrogaran a lei de seudo-matrimónios homosexuals quan muitos juratos, grants e chiquez, d’o suyo partito participan en ditas aberracions.

Asinas, toz os suyos caporals charran cuentr’a imposicion lingüística n’a ensenyança catalana quan els fan exactament o mesmo en Valéncia, an que, ta caramuello, s’ensenya en catalan, no pas en valenciano; u en Galícia, a penar d’o que Núñez Feijoo bi esfendeva n’a zaguer campanya electoral t’as autonomicas.

A lista ye interminable. Perque o PP no solo no ye a solucion, sino que o PP ye parti d’o problema, parti fundamental d’este sistema que tot l’ha podrexito e menaça con rematar con esta viella nacion nuestra.

Son delinqüents

A decision d'o concello de Vic de no empadronar pas á os inmigrants ilegals que vivan en ixa ciudat ha feito sonar as alarmas d'o sistema e ha tornato á dixar esclatera, un atra vegata, a suya hipocresia.

Blinca agora o PP con que tot ye conseqüéncia d'a enatiça politica d'o papels ta toz d'a puenda Caldera. Se'n olbidan, como gosan fer con as suyas numbrosas contradiccions, d'as regularizacions masivas, promovitas per els mesmos, n'as que valeva como decumento un abono de transporte. Ye de dar que son os d'o PP os primers que han condenato l'alcuerdo d'o concello catalan e charran de xenofóbia . Ye de dar que o guvierno de Rodríguez ha dito que a mida ye ilegal e charra de xenofóbia.

Afirman tamien os dos partitos que a decision monecipal no refleixa o sentir mayoritário d'os espanyols. Mienten de nuevas. Totas as enqüestas aparexitas estes dias en os meyos de comunicacion amonstran, como yera de dar, que buenacosa d'a poblacion, més d'o 70% en toz os casos, s'oposa á l'empadronamiento d'inmigrants en situacion irregular.

Vinon ta Espanya sin garra control. Sin garra control aforçon as nuestras buegas, as nuestras mugas. Ta forro bota, desixen dreitos e prestacions, dende a sanidat dic'a vivienda, que no siempre pueden recibir os espanyols. En garra atro país se tolera una situacion parellana.

Ye menister, en este tema como en tantos atros, que a mayoria social seiga conseqüent con as suyas valuras e dixe de refirmar á estes partitos, á este sistema, que favoreix a injustícia e o delicto. Perque estes inmigrants que dentron ilegalment en a nuestra nacion son, d'alcuerdo con a legislacion de qualsiquier país, delinqüents. Igual como son delinqüents as autoridaz complices que permition, quan no favoreixion ubiertament, dita ilegalidat.

E, per favor, que no me charren de solidaridat. Ni sisquiera de caridat. Puedo acullir en casa mia á qui truca n'a puerta e me demanda aduya; no pas á qui m'estricalla a puerta e menaça a mia seguridat e a seguridat d'os mios.

Qui dentra ilegalment en casa nuestra, no ye que un delinqüent. E ta os delinqüents no bi ha que dos camins: a prision u o foragitamiento.