No més lugars afogatos

Hue —més que més hue— tot somos Sigüés. E Mianos. E Artieda. Perque hue —e toz os dias— toz somos Mediano. E Janevas. E Lavelilla. E Lacort. E Búbal E Saqués. E Lanuça. E Arasanz. E Clamosa. E Barasona. E Finestras. E Auberola. E...

A justícia d'Almudévar

No me digaz que no ye delicto: os agricultors d’os Monegros quieren regar os suyos campos, pero no quieren pas que les afoguen os suyos secarrals. Sí, os suyos secarrals, no pas os suyos lugars, con as suyas casas e tota la vida suya, solo que bels articaços con bella capitana e poco més.

L’embalse d’Almudévar naixió con un amplo consenso, a lo menos sobre o papel. Permitiva regar a Tierra Plana sin castigar més as maltractatas vals altoaragonesas que levan decadas e decadas sufrindo tota mena de terror hidrologica. Pero, ospa, una cosa ye predicar e un atra dar trigo. Dende o concello d’o lugar dica o zaguer labrador d’o mesmo, toz ixos que s’emplenan a boca charrando d’o progreso, d’a necesidat de regar e d’os benefícios que alportan as obras de regulacion hidraulica a os lugars afectatos —quan son en a Montanya— esgargamellan agora perque os ueito millons d’euros que les dan per as suyas mil hectárias expropiatas —de secarral, repito— les pareixen poco. Esploramiqueyan tamien perque no bi ha un plan de restitucion ta compensar as afeccions. Gemecan estes pobrez per a falta de sensibilidat d’as alministracions: nos n’hemos enterato per lo BOE, ronyan gullibaixos estes profesionals d’a subvencion.

Que charren con a gent de Janevas u de Mediano u de Tiermas u de qualsiquier atro lugar nuestro. Que charren con els e se los miren en os uellos. E que dimpués se callen. D’una santa vegata.

No se'n enteran

Ni sisquiera son egoïstas, no son que ignorants. Los fan servir como monyacos. Desigen afogar un lugar, Erés, e privar a vida de tota una comarca, A Galliguera, e no paran cuenta que l'augua d'ixe pantano, que tanto dicen nesecitar, no'n será ta els, que será, entre atros usos, t'a transcolata d'o Ebro.
Ni sisquiera son egoïstas, no son que ignorants. No satisfeitos con vivir d'as subvencions, ye decir d'os nuestros diners, desigen agora progectos economicament e ecologica insustenibles como si n'o b'hes alternativas muito més baratas, e mica perjudicials t'a gent d'a Montanya, que guarancian mesmo millor os riegos suyos. A qui le interese, o suyo pantano tiene un presupuesto total que blinca d'os 120 millons d'euros (20.000 millons de pecetas)
Ni sisquiera son egoïstas, no son que ignorants. Pero quántos diners nos costa ixa ignoráncia! No contentos con as subvencions que toz os anyos les atogan os diferents guviernos -con os nuestros diners, cal ricordar-lo una atra vegata-, Riegos del Alto Aragón demanda d'espeso inversions de mils de millons (Biscarrués no ye a unica obra que revindican estos sinyors) ta embalsar més augua que afoga lugars e paisages e história quan os suyos sistemas de riegos, os piors d'as Espanyas, malfurrian l'augua arrienda.
Ni sisquiera son egoïstas, no son que ignorants. E cómo doleva veyer-los manifestar-sen este cabo de semana a Zaragoça, esberlecando sin conoiximiento. Bien se vale que o domingo, a Madrid, cientos de mils d'espanyols salion t'a carrera a manifestar-sen per una buena causa. Qué diferiéncia.

Biscarrués e a nueva cultura de l'augua

¿Se’n alcuerdan vustés d’a Expo de Zaragoza? No ye solo que os suyos pavellons, ixos que ivan a emplenar-sen d’oficinas e agéncias oficials ta benefício d’os ciudadanos, no son agora que enruenas e maruenyos. Ya sabévanos que l’acontecimiento seria un atro eixemplo de cómo se malfurrian os nuestros diners en progectos patariecos de tot. Ye tamien que ixa Expo iva a significar un cámbio en l’aproveitamiento de l’augua, una concenciacion sobre a suya importáncia e a nesecidat de fer-la servir ta usos racionals. A nueva cultura de l’augua, ¿se’n alcuerdan? Quan o Plan Hidrologico Nacional e a transcolata d’o Ebro no fevan que repetir-lo como un mantra que nos enfilaria t’a felicidat. A nueva cultura de l’augua, qué bien sona. Pero solo quan conviene, no se trafuquen vustez.

Perque si o tema ye o recreiximiento de Biscarrués (u Yesa u qualsiquier progecto pantanista e criminal), án queda ixa nueva cultura de l’augua? Dice o Centro de Estudios y Experimentación de Obras Públicas, con buena cosas d’informes, que o impacto ambiental d’o pantano de Biscarrués fa inviable de raso lo progecto. Yera de dar, un pantano no ye que un eixemplo d’irracionalidat economica e ecologica. ¿No i yéranos ya toz d’alcuerdo? ¿Alcaso no b’ha alternativas més eficients e, ta caramuello, respectuosas de tot con a naturaleça? Se coneix que no. Ya se i vei qué prestos han blincato furos os de siempre (o Guvierno d’Aragon, quasi toz os partitos politicos e os sindicatos agrários) a esfender o imposible. An que ahiere, ta refusar o PHN e promover a nueva cultura de l’augua, decivan blanco, hue, ta desigir o pantano de Biscarrués e os usos insustenibles d’o preciato liquido, en dicen negro. Negro negriço. Sin mica vergüenya torera (u ecologica).

D’alcuerdo. Bueno ye saber-lo. Perque si casa nuestra se puede afogar per lo bien comun, tamien se puede sacrificar o resto d’Aragon per lo bien comun d’Espanya e o progreso economico d'a mayoria. Asinas que, dende agora mesmo, seré o primero que se manifieste, quan calga e de buen implaz, a favor d’a transcolata d’o Ebro. E será luego. Ya lo veyeran.