O coraçon

O coraçon humano encomiença a mover-se o vinte-ueiteno dia dimpués d’a fecundacion. Abonico en primeras, con rasmia dimpuesas. Asinas, quan o dia trenta d’a vida d’o feto arriva, traquetia ya de tot. Ixo quiere dicir que, quan o nino naix, o coraçon suyo leva ya ueito meses bombeyando sangre. O coraçon, ixe musclo que asociamos con a vida, con l’amor, con as emocions, con a pasion e a compasion, controla toz os nuestros procesos vitals ueito meses antes que no naixcamos.

O coraçon. O coraçon d’o no naixito. Muito mes humano que o coraçon de qui defiende o crimen de l’alborto, genocida postema d'esta sociedat sin coraçon ni humanidat. 

A estratégia d'o $i$t€mⒶ

O corrupto sistema á o que somesos hi somos —o $i$t€mⒶ— no aspira á res més que á estar un sistema autopoietico, si hemos á fer servir a faramallosa e bofa paroleria de sociologos como Niklas Luhmann e parellanos.

O caso ye que o corrupto sistema á o que somesos hi somos —o $i$t€mⒶ— no dubda mica en destruir bels elementos suyos como respuesta á las perturbacions d’o médio ta que asinas, encara que o sistema cámbie estructuralment, o rete que fa permaneixca estable durant tota a suya esisténcia, mantenindo a identidat d’o mesmo —seguntes dicivan Maturana e Varela ta l’ambito d’a biologia— e que —seguntes as progecions que Luhmann prevó dimpués de fer servir ta os estúdios socials— seiga o própio sistema o que construiga os elementos que lo conforman.

O caso ye que, dende fa qualques semanas e como parte d’a campanya que o $i$t€mⒶ apresta t’as eslecions europeuas, imos veyendo diferents movimientos ta sayar d’achiquir una esferra en as votacions de mayo. Bels eixemplos:

1) Fa una semaneta se nunciava o naiximiento d’un nuevo partito, VOX, como alternativa á la decadéncia e ruina moral e economica que nos secute. ¿Alternativa? Prou que no. No solo hi son os de siempre —beluns encara nos ne alcordamos de quan o exministro d’a UCD Ignacio Camuñas feva campanya en favor d’a constitucion d’o 78 asegurando, entre atras muitas mentiras, que as autonomias enfortivan a unidat d’a Pátria, guaranciavan a igualdat de toz os espanyols e amilloravan l’alministracion en acercando-la á os ciudadanos— sino que esfienden os mesmos ideals que nos han feito arribar dica aquí: “VOX es un proyecto político para la renovación y el fortalecimiento de la vida democrática española” afirma justo en l’emprencípio o suyo manifiesto fundacional, quan ye precisament ixa vida democrática española a que nos ha traito esta postema que nos emponzonya. ¿Ta qué naix pues este partito? ¿Ta sacar-le votos á o PP? Me creigo que ye més bien ta espardir entre tres partitos —UPyD, Movimiento Ciudadano e agora tamien VOX— o malestar ent’o PP e fer esbafar a carranya ciudadana entre diferents opcions chiquirrinas que se presentan como regenaderas pero son controlatas per as mesmas mans que hue nos afogan.

Ademés, e per si alcaso, pareix que tamien participará n’as eslecions una atra fuerça politica: Podemos, empentata per lo televisivo Pablo Iglesias. Asinas, os descontentos con o PSOE podran trigar entre UPyD, Movimiento Ciudadano e esta nueva alternativa —IU no solo ye parte d’o sistema, sino que en ye uno d’os suyos alacez—. ¿Qué millor traça d’esfer-se d’a indignacion general que confiar-le-ne á un bamboso barbol? ¿Cal ricordar que mesmo Ruiz Mateos plegó en o parlamento europeu quan o PSOE de González yera o súmmum d’a corrupcion? ¿Per qué no podria fer-lo agora este atro aprendiz de clown? M’almira que no le’n haigan pidito á o Gran Wyoming? Encara les vaga.

2) E qué dicir de Gamonal. Independientement d’a raçon que os vicinos tenevan —e tienen— ta esfender-sen d’as cacicadas d’os suyos caporals, a verdat ye —en a mia opinion, claro— que los ha manipoliato dende a zurda e dende a dreita igual como manipolion —dende a zurda e dende a dreita­— o 15-M, que ya ni existe ni ilusiona ni menaça sisquiera.

Per un costato, se’n guardan d’a reaccion popular fendo-la esbellugar els —o $i$t€mⒶ— en chiquetas barallas inofensivas; igual como quan en a Guerra Freda os USA e a URSS provocavan numbrosos conflitos de baixa intensidat ta mantener o suyo status quo —¿qué se les davan á els os muertos en ixas guerras que ni titolars en a prensa per un regular mereixevan?— u como fa agora o NOM con tota mena de revolucions, guerras u atentatos terroristas.

Per un atro costato, movilizan á os suyos partidários. Mientres IU —ixe PSOE bis— ençuriza á las cricas suyas con os viellos lemas sanguinosos d’a guerra civil, o PP —ixe PSOE bis— ixorronta á las suyas ramadas con imágens de bellas decenetas de golagutans cremando contenedors mientres fan bailar trafallons tricolors. D’ixas carranyas e ixes miedos, bels votos en quitaran, pro á fes que sí.

3) E ta rematar, l’alborto. ¡Qué bestieças no hemos havito á sentir estes dias! E de nuevas, ta movilizar partidários d’as dos caras d’o $i$t€mⒶ.

Asinas, tota a oposicion —parlamentária e extraparlamentária— desagera o suyo desagerato aquelarre infanticida, fa mover á las suyas mullerotas e homenoz en esfensa d’una sobirania d’o cuerpo. ¿Que qué ye ixo? Pos que yo puedo fer con o mio cuerpo o que me pete. Mesmo  —e si me lo pide o body— matar atros cuerpos. Perque claro, á estes homenoz e mullerotas no les charres de l’alma, que els son uns desalmaus.

Tanimientres, o guvierno d’a nacion —e as suyas organizacions/agendas de colocacion satelites— presenta como una fita d’a esfensa d’a vida un progecto de lei que refirma e confirma a lei de 1985. Per si alcaso, apareixen bellas voces respuleras en o própio PP ta fer creyer —bueno, Mariano ye un buen hombre que fa o que puede á pesar d’as circunstáncias— que este mal ye un mal menor. ¡Qué digo mal menor! ¡Este progecto de lei que refirma e confirma a lei de 1985 ye una fita n’a esfensa d’a vida! ¿No hez visto alcaso a manifestación d’este cabo de semana en París? Somos a envídia d’a civilizacion occidental.

Á la finitiva e tornando ta l’emprencípio pero sin fer servir o bofo parlage d’a sociología: 

Se vogliamo che tutto rimanga come è, bisogna che tutto cambi. 

Giuseppe Tomasi di Lampedusa Il Gattopardo (1958).

Ixa ye a estratégia d’o sistema: Si queremos que tot contine como ye, cal que tot cámbie. No asperez que o $i$t€mⒶ permitirá garra reforma que menace sisquiera a suya identidat, a suya eséncia. Solo que o Reino de Dios nos ferá libres. Mesmo un autor tan poco cristiano como Wells reconeixió:

This doctrine of the Kingdom of Heaven, which was the main teaching of Jesus, and which plays so small a part in the Christian creeds, is certainly one of the most revolutionary doctrines that ever stirred and changed human thought.

H. G. Wells, The Outline of History (1920).

[Esta dotrina d'o Reino d'os Cielos, que ye a ensinyança principal de Gesús e que no fa que una chiqueta parte en o credo cristiano, ye ciertament una d'as dotrinas més revolucionárias que nunca haiga feito esbellugar e transformar o esmo humano].

Amanemos o Reino de Dios. Tot atro quefer ye perdemés.

O PPSOE, l'alborto e os que se dixan enganyar

Si en ye de menuta a inmoralidat d’o PP, que no han tardato ni média en fer burro falso e empencipiar á reconsiderar a suya posicion —vergonyosa de tot— respective á la lei de l’alborto. Posicion que se resume fácilment: matar en qualques ocasions ye licito e mesmo neseçário. No satisfeitos con ixa bestieça, muitos barons han feito publico o suyo refús. Se coneix que les pareix millor que una muller pueda matar á o suyo fillo no naixito siempre que le pete. Pos bien, o própio Rajoy —que ta atras muitas cosas ni tartir gosa— ya ha dito que prevará de trobar un consenso ta amillorar l’avantprogecto de lei. Guarda si en ye de bueno Mariano!

Qué feran agora os pepers que se creyevan que o suyo partito esfendeva o dreito á la vida? Sisquiera m’entivoque pero continaran fendo a gatatumba. Como siempre, que a inmoralidat e febleça d’o PP no ye mica nueva.

En Aragon, per si á belun se le da un poquet, Luisa Fernanda Rudi ya ha feito publico o suyo desalcuerdo con a reforma. Á ella le feva goyo a lei socialista de 1985. Qué feran agora os pepers que se creyevan que, en votando á Rajoy, votavan cuentra Rodríguez Zapatero e, en realidat, en votando á Rajoy, votavan per Felipe González? Sisquiera m’entivoque pero continaran fendo a gatatumba.
Perque, no me digaz que no estaria bien que o PP s’estalapiçás en as esleccions europeuas? No ta que rectifiquen, que prou que no lo feran, si no per lo conuerto de que muitos perdesen o cargo e a participacion en os presupuestos. Igual mesmo me repienso o costumbre mio de no votar nunca.



Per es Santos Innocents

A festividat d’os Santos Innocents ye, de nuevas, una buena oportunidat ta fer vistero o nuestro refús á l’alborto. Agora que o PP ha confirmato —per si encara caleva­ e belun no se’n heva quiesto enterar— que a suya politica d’esfensa d’a vida no ye que tornar t’a lei de 1985 —ixa que nos ne trayó més de 100.000 albortos per anyata— ye menister que a nuestra voz se faiga ascuitar, no ta cambiar l’actual propuesta en o tramite parlamentário d’a lei —quí puede creyer encara que o PP faria qualcosa parellana?— sino ta fer veyer á os millons de votadors catolicos que se dixan enganyar de buen implaz per es populars a verdadera naturaleça d’esta gentota, que ni esfiende a unidat d’a pátria, ni esfiende á las vitimas d’o terrorismo, ni esfiende a honradez e a racionalidat en a gestion publica, ni esfiende a creacion d’emplego ni, prou que no, esfiende a família e o dreito á la vida.

En Aragon, de nuevas, a concentracion ye en Zaragoça, en a Clínica Actur, carrera Adolfo Aznar 26 á las 12 horas d’o dia 28.

Si en querez més informacion, punchaz n’o VINCLO.

Unindo fuerças

Seguntes podez leyer en os suyos puestos web, as organizacions Veladas 25, Rosario por España e l’asociacion Cruz de San Andrés han decidito ─dimpués de fer un encertato analís d’o movimiento pro-vida en as Espanyas─ de sumar as suyas fuerças ta fer més present en a sociedat as iniciativas que promueven.

De seguro que, con a colaboracion de toz, esta nueva estratégia en a luita per a esfensa d’a vida e per a regeneracion moral d’Espanya, que tiene como alacet a Fe e a oracion, ferá buena honra á la nuestra nacion.

Tos ricordamos que en Aragon as concentracions cuentra l’alborto se fan toz os dias 25 de cada mes, de 20:00 á 21:00 horas, en a plaça d’Espanya de Zaragoça; e que o Rosário per Espanya se fa toz os dias 12, á las 20:00 horas, en a plaça d’o Pilar d’ixa mesma ciudat.

Ye a hora d’a reaccion.

O PP e os bispes

Ha feito Alfonso Alonso, portavoz d’o PP en o Congreso, unas declaracions que, ves-te-ne á mirar per qué, han sorprendito á beluns. Ha dito o personajot que en Espanya as leis las fa o parlamento, no pas os bispes. As suyas parolas textuals son estatas: “España es una democracia avanzada, con un marco de instituciones y, las leyes las hace el Parlamento, los obispos opinan pero no hacen las leyes”.

Sin fer mencion d’o fástio que me fa o sintagma “democracia avanzada” —més que més referito á Espanya— o que este homenot nos ha ricordato no ye que a trista realidat. Una trista e dolenta realidat que millons de catolicos no solo no quieren reconeixer, sino que s’encerrinan en empiorar atorgando lo suyo voto á o partito d’este sanselon. E per si encara no se’n hevan enterato, Alonso ha anyedito que o que siempre "defendió el PP es que el Gobierno iba a devolver la Ley del Aborto a esa doctrina de 1985", "de la que se había alejado la ley por una decisión unilateral del PSOE en la anterior legislatura".

Que no gemequen agora ixes millons de catolicos que malfurrion o suyo voto en o PP e viengan dicindo que Rajoy los ha enganyatos. Rajoy yera menistro —mesmo vicepresident— en os guviernos d’Áznar. Ixos guviernos que baixo es suyos mandatos s’asesinon quasi 600.000 innocents, pasando d’una tasa de menos de 6 albortos per cada mil mullers á un atra de 8,94. Que no gemequen e lo tiengan prou present, no solo que á l’hora de votar, sino á l’hora d’esfender en a carrera o dreito á la vida.

E que lo tiengan prou present os bispes. E o Papa Francho quan recibe á Rajoy en o Vaticano.

Més concentracions per a vida

Nuevas concentrancions en esfensa d’a vida. Esta vegata las convoca l’asociacion Si a la vida e la refirman quasi cincocientas organizacions de diferents païses.

En Aragon ne b’ha una en a ciudat de Teruel o sabado 6 d’abril á las 13.00 horas en a Plaça d’o Torico. En Zaragoça ya se hi fació —o domingo 17 de março á las 12:00 horas en o Parque Gran— encara que, culpa nuestra, no nos ne enterásenos e no púdenos nunciar-lo.

Agora solo queda que en Uesqueta ­—u en Balbastro u en Monçon u en Jaca u en L’Aïnsa­— se hi faiga tamien qualque concentracion t’a venient convocatória. Pararemos muita cuenta.

Més informacion en este vinclo.

Concentracions per a vida

Ricorda-tos que o 25 de março, Luns Santo e Solemnidat de l’Anunciacion d’o Sinyor, a Coordinadora Española por la Vida —organizacion que arrocla á 63 entidaz que luitan cuentra o  genocídio albortista— ha convocato, de nuevas, diferents concentracions pro-vida en muitas ciudaz e lugars d’as Espanyas. En Aragon, a cita ye en a plaça d’Espanya de Zaragoça, d’as 20 á las 21:00 horas.

O 25 de março ye, ademés, o Dia Internacional d’a Vida e, doncas, una ocasion sobrebuena ta fer vistera l’asesinadera hipocresia d’o Partito Popular que no ha quiesto —ni agora ni nunca—empentar una política que garancie o dreito á la vida de tot ser humano, sino que siempre ye estato igual d’albortista como as atras fuerças que emporqueyan o parlamento espanyol.

Sisquiera toz os catolicos espanyols prengan concéncia d’a nesecidat de refirmar un partito confesional que esfienda a dotrina moral e social d’a Ilésia. Sisquiera toz os bispes espanyols tamien se hi faigan.

Més informacion sobre as concentracions, que se fan o dia 25 de cada mes, en este vinclo.

Unitos cuentra l'alborto

O 28 d'aviento, festividat d'os Santos Innocents, bels partitos politicos e asociacions socials han convocato concentracions cuentra l'alborto en diferents ciudaz espanyolas. Como hi veyez, en Aragon no'n bi ha que una: en a Clínica Actur de Zaragoça, en a carrera Adolfo Aznar, 26. ¡No hi faltez!

Os bispes catalans, o património aragonés e atras cosas muito més greus.

O 19 d’octubre de l’anyo pasato, monsinyor Renzo Renzo Fratini, Núncio d’o Vaticano en Espanya, aseguró á la presidenta d’o Guvierno d’Aragon e á o bispe de Balbastro-Monçon, que en un plaço d’entre nueu e doce meses es biens tornarian t’a diocesis aragonesa. Ye dicir, manyana se cumple ixe plaço e as obras d’arte sacro continan en Lerida.

Dende que o Núncio fes ixas declaracions, no b’ha havito garra movimiento que faiga creyer que a tornata ye agora posible. Asinas, no b’ha havito contactos entre os egecutivos regionals en un anyo, s’ha esbafato a reaccion política —quan os partitos, emprencipiando per lo PP que yera en a oposicion, estion beligerants de tot en l’anterior legislatura quanto á la reclamacion— e tampoco no as autoridaz vaticanas ni as eclesiasticas d’Aragon e Cataluya en han tartito res.

Ixo sí, Alfonso Milián, bispe de balbastro-Monçon, explicó, á zaguers de juliol quan remató o primer plaço dato per lo Núncio, que “no sólo depende de la iglesia la devolución de las 112 piezas de arte” e sinyaló que “lo fundamental para que no se devuelvan las obras de arte no está en la iglesia”. Con més buena voluntat que no sentito d’a realidat anyedió que “si dependiera sólo de la iglesia este asunto estaría solucionado puesto que el obispo de Lérida reconoce que la propiedad es de las parroquias que pertenecen a la diócesis de Barbastro-Monzón y está dispuesto a devolver los bienes”.

Talment no sepa o sinyor bispe —u s’estime millor no saber— que os suyos companyers catalans pareixen més precupatos per construyir a identidat nacional catalana que per fer cumplir as senténcias vaticanas. ¿Per disgrácia, qué no podrinos asperar d’uns bispes que pareixen callar devant de l’alborto en hespitals “catolicos”?

Guaranciamos l'alborto

Tasament unas horetas dimpuesas de que l’Asociación de Clínicas Acreditadas para la Interrupción del Embarazo (ACAI) nunciás que suspendeva —per qüestions economicas, as unicas que se les dan á estes matachins— l’alcuerdo que manteneva con l’alministracion regional, que facilitava a muerte de més de dos mils inocents toz os anyos en a nuestra tierra, o guvierno aragonés correva áa guaranciar a continidat de l’alborto en a region. 

Fuents d’o Departamento de Salut e Consumo reconeixevan este maitino o "dreito" d’a muller á interrumpir su embarazo e fevan publico o suyo compromís á seguir manteniendo ese servicio. O compromís alquirito suposa que se podrá albortar con os meyos própios d’o sistema publico —o que será "més economico" ta o guvierno regional— e que, si no se podés atender tota a demanda, se menaran as pacients ta clinicas de regions buebatiças; siempre "de forma gratuita" t’a muller, prou que sí. 

Ta que quede muito claro, dende Madrid, o Ministério de Sanidat ha ricordato hue mesmo que l’alborto ye una prestacion incluyita en o Sistema Nacional de Salut que ha á cubrir-se en totas as regions d’o país. "Si no lo fan as clinicas privatas, con as que b’heva concierto, l’havran á fer es hespitals publicos. No b’ha garra problema. A prestacion ye guaranciata", sinyalavan fuents d’o Ministério de Sanidat. 

Se coneix que ta qualques cosas no b’ha retallatas. Per si encara belun teneva bella dubda d’as prioridaz d’os liberals.

Ta votacions, as d'Eslovénia

Podrí escrivir sobre as esleccions andaluças, pero como ya l’han feito —dinantes e millor que no yo lo farí— en atros quadernos de bitacora  (Embajador en el infierno, per eixemplo, en ofreix un analís insuperable con referéncias a atros articlos), puedo escusar-me o treballo.

Conque m’estimo millor escrivir sobre un atro referendum tamien feito este domingo pero prou més interesant, o celebrato en Eslovénia e n’o que os eslovenos refuson un nuevo codigo d’a família que quereva aplicar o mesmo estatuto legal reservato á os matrimónios; no solo que en qüestions d’heréncio u fiscalidat, sino mesmo fendo tranya á l’afillatura, á las parellas homosexuals.

Collas civils, refirmatas per a Ilésia catolica, ajunton as 40.000 firmas neseçárias ta organizar una consulta popular sobre a lei d'a família que heva aprevato l’anterior guvierno en junyo de 2011.

PS En Eslovénia tampoco no se cumplion as enqüestas. Á vier si beluns paran cuenta e no les fan tanto caso á os sociologos.

Carta á os Reis Magos

No soi estato guaire bueno estianyo que plega de rematar, lo reconeixco. Asinas que si m'atrivo á escrivir una carta á las suyas Magestaz d'Orient, no he atro remédio que estar realista —que no reyalista como lo serí si bueno hi fues estato— e no pidir tot o que querrí. En conseqüéncia, no demandaré que una coseta: un guvierno t'as Espanyas parellano —si no igualet— á l'hongaro.

Con o nuevo anyo, Hongria ha recuperato o suyo nombre tradicional: Magyarország. Albandona, á la fin, a enatiça denominacion de Republica d'Hongria —Magyar Köztársaság— impuesta per as genocidas tropas sovieticas. A recuperacion d'o nombre yera prevista en a constitucion aprevata l'anyo pasato e que tamien s'ha feito valera este zaguer 1 de ginero. Una constitucion que ya s'emponderó en esta humil bitacora perque, entre atras cosas, inclui una referéncia exprisa á las radices cristianas d'o país, una esfensa exprisa d'o dreito á la vida —a vida d'o feto deverá estar protegida dende o momento d'a concepcion afirma literalment a carta magna—, una esfensa exprisa d'a família tradicional —guaráncia d'a pervivéncia d'a nacion—, una negacion exprisa d'a consideracion de matrimónio  —una comunidat de vida alacetata en a decision voluntária d'un hombre e una muller— á las unions aberrosexuals; una referéncia e esfensa exprisa, á la finitiva, á la dignidat humana. Ricordemos as parolas con que emprencípia l'actual constitucion hongara:

Dios salve á Hongria.

Nusatros, o pueblo d'Hongría, conscients d'a nuestra responsabilidat, decimos o siguient á toz es hongaros, en este prencípio de milénio:

-Somos argüellosos de que o nuestro rei Estevan, santo patron d'Hongria durant mil anyatas, haiga estatuecito sobre buenos alacez a nuestra pátria, incorporando-la á la Europa cristiana.

-Somos argüellosos d'os nuestros avantpasatos, que se hi fiçon e luiton per a libertat e a independéncia d'a nuestra pátria.

-Somos argüellosos d'os grans logros esprituals d'o pueblo hongaro.

-Somos argüellosos de que o nuestro pueblo haiga esfendito Europa durant mil anyatas e que as suyas valuras comunas s'haigan enriquexito con os suyos talientos e os suyos esfuerços.

-Reconeixemos o papel d'o cristianismo n'a pervivéncia d'a nacion.

E a cosa no s'ha quedato en una bofa estrolicadera. Per eixemplo, o guvierno de Viktor Orban, mesmo antes que no a constitucion se fes valera, ya emprencipió una campanya institucional ta achiquir o numbro d'albortos con anúncios que amonstran un feto e n'os que se hi lei: 

Entiendo que no seigas presta ta tener-me, pero podrevas dar-me en afillatura, ¡Dixa-me vivir!

Per ixo, esta tardi, mientres escrivive a carta á os Reis Magos, me'n alcordave  de Sant Estevan, de Santa Gisela, de Sant Emerico, de Sant Ladislau, de Santa Isabel, de Santa Margarita e d'a nuestra reina Violant —a muller d'o buen rei Jaime I— me'n alcordave. E, mientres o Isten, áldd meg a magyart —Dios, bendiz á la nacion d'os hongaros, o suyo himno nacional— sentive, si no una monarquia tradicional con un rei legitimo, un guvierno no criminal —á lo menos— t'a mia Pátria pidiva. 
Encara que o PP no siga o Fidesz ni os catolicos espanyols —teoricament muito més numbrosos— no sigamos como ixe 67.5% de catolicos hongaros que votan —seguntes pareix— con qualque més coheréncia que no nusatros.

Zaragoça per a vida

Tamien ahiere, festividat d'os Santos Innocents, se fiçon en Aragon concentracions en esfensa d'o dreito a la vida e cuentra o crimen de l'alborto. En veyendo o siléncio d'os meyos de comunicacion, mesmo es regionals, sobre ditas actuacions, traduzco a informacion que sobre a concentracion de Zaragoça apareix en a pagina d'Alternativa Española, partito que ha convocato concentracions parellanas en atras ciudaz espanyolas.

O 28 d'aviento se fació, un atro anyo, una concentracion devant d'a clínica albortista Actur.
L'acto, convocato per Alternativa Española e a Plataforma Cívica de las Familias Cristianas, fue a las 19:30, a o mesmo tiempo que se producivan atras quince concentracions devant d'atras tantas clínicas albortistas d'atros puntos d'Espanya.
En o transcurso d'a concentracion se charró d'a nesecidat de refirmar a las mairs per parti d'as alministracions, ademés d'a nesecidat d'informar e explaniquiar clarament qué ye l'alborto e a drama que supone ta una muller.
Como coda, uno d'os asistents leyó un manifiesto an que s'instava a o nuevo guvierno de Mariano Rajoy a estar valient e rematar con l'alborto en Espanya, a fomentar as aduyas a la maternidat e l'adopcion e animava a os presents a no revlar en a luita per lo dreito a la Vida.
(Fuent: Alternativa Española)

Per qué no te callas?

O perjuro que s’entrepuça con as puertas d’o suyo palácio recullió ahiere una grandiça ovacion de parte de bels seicientos privilegiatos que viven, tamien els, como reis á penar d’a crisis que han contribuyito a trayer.

O nuevo Herodes —més d’un millon e médio d’albortos feitos grácias á las leis que, satisfeito e de buen implaz, ha firmato l’abraçador d’asesinadors— mesmo s’emocionó devant d’o carinyo que l’amonstron os que treballan, tamien els, per crepar Espanya.

L’amigo d’os Albertos, de Mario Conde u de Manuel Prado y Colón de Carvajal, no saveva si plorar u esmelicar-se-ne per a reaccion que o suyo mensage d’austeridat e decéncia prevocó en os que s’ajuntan con empresários en benzinerias, s’enreligan en retes de correyas e bigoz u se benefícian con os diners d’os ERE.

O suegro d’Urdangarin charró d’a confiança en as institucions mientres os seicientos privilegiatos pensavan en qué nuevo fiscal general podevan nombrar u á quí proposar como nuevos miembros d’o Tribunal Constitucional ta que se hi contine aprevando reformas estatutárias, legitimando partitos pro-etarras u sinyalando a constitucionalidat d’as unions aberrosexuals.

O que se’n fa a rialleta quan parla con os independentistas, ascuitó ploramicoso os chilos de viva el rey (sic) que, devant d’as suyas sinceras parolas de patriotismo, no pudon privar os que pactan, tamien els, con separatistas.

Á la fin, l’almirador de Rodríguez —aconortato per l’amor que le profesan os que s’enriqueixen grácias á o sistema que a suya traiduria nos impuso— se’n tornó t’o suyo palácio a siguir entrepuçando-se con as puertas.

L'alma e os diners

Yera de dar: a gent ye blincata ascape cuentra a primer mida que han preso as nuevas Cortes —que ta esto prou que s’han entendito decamin— e que ye una indemnización por cesantía ta os deputaus que rematen o suyo mandato e no tiengan emplego. Dita indemnizacion no ye garra estopéncia: 2.967 euros mensuals, que podran cobrar tantos meses como anyatas estuvon de parlamentários, dica un maximo de 18.

Prou que l’alcuerdo ye una vergüenya, més que més en metat d’esta crisis. Pero lo problema ye que esta crisis e esta —e atras muitas— desvergüenyas d’os nuestros caporals no son que a conseqüéncia natural d’a corrupción moral que empesta, dende fa decadas, a la sociedat espanyola.

Una nacion que asesina os suyos fillos antes que no naixcan e a ixe crimen lo clama dreito; u que declara matrimónio a union de dos hombres u dos mullers e les atorga o dreito a afillar una mainada, negando a ixos ninons o verdadero dreito, o dreito a una família; una nacion que permite que toz os suyos guviernos se refirmen en partitos que o suyo unico ogetivo ye esfer ixa nacion e que altroxen de contino —toz os dos: os guviernos e os partitos nacionalistas— a Espanya; una nacion, a la finitiva, que no tiene atra politica que no seiga que enrestir cuentra a Religion, a Família e a Pátria se mereix esto e muito més.

Gemecamos —perdemés— agora que nos furtan os diners. Deverinos d’haver-nos devantatos —prestos— quan emprencipion a furtar-nos l’alma.

A indignidat d'as Cortes

O pasato viernes, as Cortes d’Aragon zarron a suya puenda de sesions per esta legislatura. No sé si belun se’n havrá apercibito. No pas yo, que no los trobo á faltar. Igual como no trobo á faltar á ixe president autonomico, que fa de secretário de quimisió á Madrid, e ya no exerze de caporal d’Aragon. No sé ta qué pagamos os bogals sueldos de tota esta gentota que o suyo treballo ye prescindible de tot.
O caso ye que o pasato viernes as Cortes d’Aragon rematon a legislatura, e cómo lo fiçon? Pos aprevando una lei sobre ixo que beluns claman muerte digna, encara que mica aduye á la dignidat d’a persona ni á l’exercício d’a prautica sanitária.
Talment as cortes d’Aragon no sabevan que o sabado yera o dia internacional d’a vida e que, per ixo mesmo, b’havió 80 concentracions en Espanya, tamien en Aragon, an que cientos de mils de personas desigiemos o respecto á o primero d’os dreitos humanos. Talment as Cortes d’Aragon tampoco no sabevan que as familias aragonesas son as que pagan més impuestos de tota Espanya. A cifra no ye chiqueta: una família meya que tienga rentos d’o treballo de dica 44.000 euros, fillos chiquez e pague hipoteca caixará d’impuestos 3.540 euros, o que ye 2.910 euros més que a mesma família en Castiella e Lion. Pero claro, sobre ixo no legislan pas as Cortes nuestras, a prioridat ye o dreito á la muerte digna, no pas a proteccion d’a família.
Tampoco no legislan ta millorar a sanidat. Á las suyas sinyorias no se les da mica que as nuestras listas d’aspera no faigan que creixer, que, dende que ye l’autonomia qui s’ha feito cargo d’as transferéncia de sanidat, a calidat de toz os sevícios no faiga que empiorar. Ni b’ha meyos ni b’ha personal, pero sobre ixo no legislan pas as Cortes nuestras, a prioridat ye o dreito á la muerte digna, no pas á la sanidat digna.
O pasato viernes, as Cortes d’Aragon zarron a suya puenda de sesions per esta legislatura. Asinas per lo menos dixaran d’emporquiar, encara que només siga que bels meses, o nombre d’una institucion que ye milenária e que os actuals deputaus han convertito en un circo; un circo indigno e caro.

Congreso pro-vida á Zaragoça

Os dias 6, 7 e 8 de noviembre se ferá n'o auditório de Zaragoça a quatrena edicion d'o Congreso Internacional Provida. En tenez muita més informacion n'a suya pagina web http://www.prolifeworldcongress.org/zaragoza2009/