Unindo fuerças

Seguntes podez leyer en os suyos puestos web, as organizacions Veladas 25, Rosario por España e l’asociacion Cruz de San Andrés han decidito ─dimpués de fer un encertato analís d’o movimiento pro-vida en as Espanyas─ de sumar as suyas fuerças ta fer més present en a sociedat as iniciativas que promueven.

De seguro que, con a colaboracion de toz, esta nueva estratégia en a luita per a esfensa d’a vida e per a regeneracion moral d’Espanya, que tiene como alacet a Fe e a oracion, ferá buena honra á la nuestra nacion.

Tos ricordamos que en Aragon as concentracions cuentra l’alborto se fan toz os dias 25 de cada mes, de 20:00 á 21:00 horas, en a plaça d’Espanya de Zaragoça; e que o Rosário per Espanya se fa toz os dias 12, á las 20:00 horas, en a plaça d’o Pilar d’ixa mesma ciudat.

Ye a hora d’a reaccion.

O zaguer barometro autonomico d'o CIS

Encara que uno malfia —e muito— d’a sociologia e atras céncias parellanas, servidor no puede dixar de fer qualques comentários sobre o zaguer barometro autonomico d’o CIS; més concretament sobre os resultatos quaternatos ta Aragon per lo que fa á l’autonomismo e á totas ixas barucas identitárias que tan buena pocha han feito á os politicos —e á os suyos familiars, amigos e banquers— e tanta mala honra nos han feito á la resta. No cal sinyalar que o devantdito barometro —e ixo que será cocinato ta mascarar as respuestas e fer-las menos negativas ta o guvierno que lo encarga— encierta con o que toz sentimos contino en a carrera e que ta este viage no fevan falta alforchas ni os diners presupuestatos t’a macroenqüesta.

Qüestions crematísticas alparte, á la pregunta 12 —que tracta sobre a traça d’organizacion d’o estato— o 34’5% d’os enqüestatos s’amonstra favorable á la existéncia d’un unico guvierno central sin d’autonomias e o 16’6% s’estima millor un estato an que as regions tiengan menos autonomia que en l’actualidat; mientres que solo que o 7’9% d’as respuestas demandan un estato con més poder autonomico e tasament un 3’6% son partidarios d’un estato que reconeixés a posibilidat de que as comunidaz autonomicas s’independizasen.

A pregunta no solo amonstra o firme refús d’os aragoneses á os procesos independentistas que dende fa decadas menaçan a unidat d’as Espanyas, sino que ye un veritable refleixo d’a fartalla d’o pueblo respective á la esferra autonomica. Per ixo, á la pregunta 13, E, més en concreto, ¿á vusté, personalment, le faria goyo que o grau d’autonomia d’Aragon fues mayor, menor u igual que lo ye en l’actualidat? solo que o 18’6% sinyalan que lo querrevan mayor devant d’o 26’2% que lo preferirian menor e o 31’4% que lo dixarian como hi ye; un 10’8% no sabe e un 13% no contesta, que tamien ye prou significativo d’a indeferiéncia que fa l’autonomismo.

En a mesma línia, á la qüestion: ¿Creye vusté que, en general, a creacion e desarrollo d’as Comunidaz Autonomas ye estato ta Espanya qualcosa més bien positiva u més bien negativa? —pregunta 16—, o 37’4% la judga més bien positiva e o 43’3% més bien negativa. E á la pregunta 16cB: En a suya opinion, dende que existen as Comunidaz Autonomas, as diferiéncias de prosperidat u riqueça entre as diferents regions e nacionalidaz (sic), ¿han tendito més bien á creixer, més bien á achiquir-sen u son quedatas si fa u no fa iguals? o 68’1% responden que han tendito més bien á creixer

Per si encara no yera a cosa clara, á la pregunta 17: En conjunto, ¿cómo diría vusté que ha funcionato en estas anyatas a organizacion d’o Estato en Comunidaz Autonomas: muito bien, bien, regular, mal u muito mal? solo que o 0’6% contesta que muito bien e o 8% que bien; o mal, manimenos, alcança o 28% e o muito mal plega en o 6’9%. Tampoco no pareix que o 46’6% que opina que a organizacion autonomica ha funcionato regular seiga guaire partidário d’un sistema que  —seguntes nos vendion— amanaria l’alministracion á la gent, amilloraria a gestion e frenaria o independentismo en reconeixer as singularidaz regionals, mientres que ha feito tot o contrário.

E si nos centramos en o sentimiento d’identidat veyemos que —e á tamas d’as autonomias­— o 64% d’os enqüestatos responde ­—pregunta 18: Qué significa Espanya ta vusté?— que Espanya ye o suyo país, e un 14’9% sinyala que ye una nacion d’a que se siente miembro. Tasament un 5’8% se creyen que ye un Estato formato per várias nacionalidaz (sic) e regions e un rediclo 0’2% contesta que ye un Estato alleno, d’o que o mio país no fa parti.

Refirmando ixas afirmacions, a pregunta 37: Con quál d’as siguients frases s’identifica vusté en mayor mida? reculle estas contestacions:

    Me siento unicament espanyol: 11’5%

    Me siento més espanyol que aragonés: 8’2%

    Me siento tan espanyol como aragonés: 60’7%

    Me siento más aragonés que español: 14,5%

    Me siento unicament aragonés: 0’4%

    No sabe 0.3%

    No contesta 4.5%      

Un sentimiento d’espanyolidat que ye mesmo superato per lo catolicismo d’os aragoneses: Cómo se define vusté en matéria religiosa: catolico, creyent d’atra religion, no creyent u ateu? (pregunta 47):

    Catolico: 82’4%

    Creyent d’atra religion: 1’2%

    No creyent: 7’6%

    Ateu: 7’6%

    No contesta: 1’2%     

A conclusión ye óbvia, á que asperamos os aragoneses —católicos e espanyols como hi somos— ta organizar-nos e actuar como tals? A situacion d’a Pátria ya no nos permite aladiar-nos u fer-nos o mondiu.

(Si querez mirar-tos toz os datos: FUENT)

No nos ne olbidamos

Encara que no mereixcan ni una breu nota en a prensa u bels segundos en as rádios e as televisions occidentals, cientos de mils de catolicos continan sofrindo á diário persecucion en muitos païses d’os cinco continents; quasi siempre per parti d’os musulmans, pero tamiem per es hinduïstas u es marxistas; mesmo es budistas, que á sovent se fan servir como modelo de toleráncia, enristen cuentra os catolicos de Sri Lanka.

A lista de nacions an que os cristianos sofren martírio ye tragicament larguiça. Síria, a Republica Centroaficana, Tançánia, Sudan, Kazakhistan, Corea d’o Norte u China no’n son que bels eixemplos. Igual como Nigéria, un atro eixemplo de l’ódio anticristiano.

Recientement, a Ilésia Catolica d’o Estato de Benue, n’o centro d’a Nigéria, ha feito un balance realment nastador d’a botinada de destruccion d’a que ye victima per parti de fuerças radicals islamicas.

Asinas, en una nota ninviata á l’agéncia Fides, denúncian que més de 70 ilésias son estatas estricallatas, e mils de fiels, més que més en lugarons isolatos, no tienen garra puesto de culto.

Felix Apine, Coordinador d’a Comision "Justícia, Desarrollo e Paz" d’a Diocesis de Makurdi, capital d’o Estato de Benue, bi explanica, n’a devantdita nota, que 30 ilésias que b’heva en l’ária de Gwer occidental son estatas crematas u espaldatas de tot, e que os fiels han havito á fuyir-ne. Atras 40 ilésias son estatas destruyitas en l’ária de Guma. A esferra inclui tamien escuelas primárias e secundárias pertencients á la diocesis.

O mesmo toz os días e en decenas de païses. Més de 100.000 cristianos asesinatos en 2012 per, simplament, querer vivir a suya fe. No nos ne olbidamos. No nos ne olbidemos.



Que o Sinyor Sant Jorge nos aduye

E assimesmo ordenamos, que la fiesta del glorioso Martyr senyor san Iorge, que caye a XXIII dias de abril, sia en el dito Regno inviolablemente, e perpetua, guardada, observada e celebrada solemnement: assí como los días del Domingo e otras fiestas mandadas guardar. E todos los Prelados del dito Regno sian tenidos aquella mandar guardar e observar, jus aquellas penas mesmas que deven e son tenidos fazer observar e guardar los Domingos e otras fiestas.

Fuero d’as Cortes d’Aragon. Calatayut, (1461).

Que o Santo patron d’este viello Reino nos aduye hue á vencer á o moderno dragon que nos menaça e podamos ganar á o mal a batalla, igual como es cavallers aragoneses ganon en 1096 a batalla d’Alcoraz grácias á la intervencion d’o Santo mártir. 

Que no calga luitar, pero que sí cal, nos enfrontinemos á o combate con a valor, a dignidat e a fe d’es guerrers de Cristo.

O zaguer bucardo

O zaguer bucardo —millor dito, a zaguer bucarda, perque una fembra o zaguer eixemplar d’a espécie hi yera­—­ ya se troba ­—dixecato, prou que sí— en o Centro de Visitantes d’o Parque Nacional de Ordesa y Monte Perdido an que se hi ha creato una cambra adedicata á la suya memórIa inaugurata fa bels dias per lo consellero d’Agricultura, Ganadería y Medio Ambiente, Modesto Lobón.

Seguntes o consellero, o egecutivo aragonés mirará de nuevas de revilcar esta espécie autoctona —a capra pyrenaica pyrenaica— que s’amortó en o 2000 quan Celia, una fembra de trece anyos, estió aplanata per un árbol.

Diez meses dinantes d’a suya muerte, un equipo de tecnicos d’o guvierno d’Aragon e d’o Parque Nacional la hevan capturata ta obtener-ne celulas que podesen conservar-sen gelatas. Asinas, tres anyatas dimpués d’a suya muerte, o Centro de Investigación y Tecnología Agroalimentaria de Aragón clonó, á partir d’ixas celulas, esta espécie ya declarata amortata. A bucarda clonata no vivió que uns menutos perque morió d’una insuficiéncia respiratória. Seguntes o consellero, a posibilidat de repetir esta aberracion acientifica ye posible ya que encara se conservan celulas gelatas d’as que le sacon á o zaguer eixemplar vivo.

Sin entrar agora en a penible actuacion d’os guviernos regionals que, per decadas, no supon —u no quison— prener as midas ta evitar que o bucardo s’amortás quan posible encara hi yera, uno no puede dixar de fer una comparacion entre a extincion d’o bucardo e a extincion de l’aragonés.

Sisquiera dintro de qualques anyos os mios nietos no visiten una cambra adedicata á o nuestro idioma —amortato altalle­— en bel centro d’interpretacion u en bel museu etnologico. Sisquiera dintro de qualques anyos os mios nietos no sientan charrutiar un idioma clonato, fruito d’a delera irresponsable d’uns politicos més parellanos á o doctor Frankestein que no á doctors en Filologia.

O PP e os bispes

Ha feito Alfonso Alonso, portavoz d’o PP en o Congreso, unas declaracions que, ves-te-ne á mirar per qué, han sorprendito á beluns. Ha dito o personajot que en Espanya as leis las fa o parlamento, no pas os bispes. As suyas parolas textuals son estatas: “España es una democracia avanzada, con un marco de instituciones y, las leyes las hace el Parlamento, los obispos opinan pero no hacen las leyes”.

Sin fer mencion d’o fástio que me fa o sintagma “democracia avanzada” —més que més referito á Espanya— o que este homenot nos ha ricordato no ye que a trista realidat. Una trista e dolenta realidat que millons de catolicos no solo no quieren reconeixer, sino que s’encerrinan en empiorar atorgando lo suyo voto á o partito d’este sanselon. E per si encara no se’n hevan enterato, Alonso ha anyedito que o que siempre "defendió el PP es que el Gobierno iba a devolver la Ley del Aborto a esa doctrina de 1985", "de la que se había alejado la ley por una decisión unilateral del PSOE en la anterior legislatura".

Que no gemequen agora ixes millons de catolicos que malfurrion o suyo voto en o PP e viengan dicindo que Rajoy los ha enganyatos. Rajoy yera menistro —mesmo vicepresident— en os guviernos d’Áznar. Ixos guviernos que baixo es suyos mandatos s’asesinon quasi 600.000 innocents, pasando d’una tasa de menos de 6 albortos per cada mil mullers á un atra de 8,94. Que no gemequen e lo tiengan prou present, no solo que á l’hora de votar, sino á l’hora d’esfender en a carrera o dreito á la vida.

E que lo tiengan prou present os bispes. E o Papa Francho quan recibe á Rajoy en o Vaticano.

Més concentracions per a vida

Nuevas concentrancions en esfensa d’a vida. Esta vegata las convoca l’asociacion Si a la vida e la refirman quasi cincocientas organizacions de diferents païses.

En Aragon ne b’ha una en a ciudat de Teruel o sabado 6 d’abril á las 13.00 horas en a Plaça d’o Torico. En Zaragoça ya se hi fació —o domingo 17 de março á las 12:00 horas en o Parque Gran— encara que, culpa nuestra, no nos ne enterásenos e no púdenos nunciar-lo.

Agora solo queda que en Uesqueta ­—u en Balbastro u en Monçon u en Jaca u en L’Aïnsa­— se hi faiga tamien qualque concentracion t’a venient convocatória. Pararemos muita cuenta.

Més informacion en este vinclo.