Confieso a mia ignoráncia: defuera de Luisa Fernanda Rudi, no conoxeive —dica ahiere— o nombre de garra component d’o nuevo guvierno d’Aragon. Entre atras cosas, perque o guvierno naixito d’as esleccions de mayo encara no ha feito res ta mereixer o mio interés. E quasi ye millor que continen asinas, que como les dé per actuar, será mesmo pior.
Pero ahiere siento en a rádio que o consellero de facienda d’o guvierno d’Aragon ha presentato un diz que plan ta alcorçar o gasto publico. No criticaré ixe diz que plan, encara que no seiga que a bofa estrolicadera que gosa fer, per un regular, o nuestro politicamen. No, me centraré en o consellero. E no en o feito de que baladroneye de liberal —atros balloqueyan de marxistas con 300.000 euros en fundos d’inversion manullatos per os mercatos capitalistas; prou sabemos que o politicamen pátrio esfiende tota mena d’esclavitut laboral e qualsiquier privilégio economico—. No, hue charraré, u escriviré, sobre o pasato mosical d’o nuevo consellero. Perque, no sé si dinantes de fer-se liberal u mientres ya lo yera, o sinyor Garcés estió cantautor. Mesmo actuó en Nueva York con Labordeta. No sé si ixa u belatra d’as suyas actuacions mosicals estió subvencionata, pero sí sé, e de buenos corros, que l’agora consellero grabó un disco en aragonés. O disco, que pagó o Consello d’a Fabla Aragonesa, se clamava Fendo camín (1983) e yera malo. Malo que en pudiva. Talment b’haiga encara bella cinteta u bel vinilo a la venda per si belun quiere comprevar-lo. A cosa ye que o Consello d’a Fabla Aragonesa le paga un disco a o sinyor Mario, que se coneix que heva feito publico o suyo deseyo de grabar en a nuestra luenga, en unas envueltas en que a grabacion d'un LP, mira-tos cuántos discos se grabon en Aragon en 1983, yera tot un privilégio. Como lo disco no tiene mica exito —¿he dito ya que o disco yera malo, malo que en pudiva?— o sinyor Garcés s’adedicará a criticar d’espeso a os que hevan meso os diners e as ganas ta que el grabás a suya obra. No sé si ixos malos modos u ixe sentito d’a gratitut e de l’autocritica l’havrá aduyato en a suya, esta sí, exitosa carrera politica, pero me sansonio que prou.
Asinas que quan ahiere siento en a rádio que o consellero de facienda d’o guvierno d’Aragon, sinyor Garcés, ha presentato un diz que plan ta alcorçar o gasto publico, no puedo dixar de deseyar que tienga un poquet més de taliento t’as finanças d’o que demonstró t’as cancions. E millors modos que no demonstró altalle.
