Més asesinatos en Nigéria

Ye menister ricordar-lo. Encara que ye imposible de quaternar totas as enrestitas que sofren os cristianos en tantos e tantos païses d’o mundo, ye menister ricordar-lo. Hue, bels médios d’informacion —no pas guaires, como ye o triste e vergonyoso costumbre d’este vergonyoso e triste occident nuestro— tornan á charrar d’una atra esferra cuentra os cristianos de Nigéria. Decenas de presonas —bellas 74 seguntes as fuents, encara que o balance ye provisional— son estatas asesinatas a semana pasata en dos atentatos en o norte de Nigéria. As enrestitas causon, ademés, un numbro indeterminato de feritos ­—atras decenas més— en una ilésia catolica d’o estato de Borno e un mercato n’o estato de Adawawa. En a enrestita cuentr’a ilésia d’o pasato domingo, en a ciudat de Waga Chakawa, havrian muerto á lo menos 22 fiels; mientres que més de cinquanta presonas estion asesinatas en o mercado de Kawuri vitimas tamien d’atra esferra terrorista. A ilésia estió enrestita mientres se hi feva a santa misa. Os terroristas disparon cuentra os fiels e beluns fuen feitos refens.  As dos enrestitas s’acumulan á la colla terrorista islamista Boko Haram, que campa salvage en esta region de Nigéria. En Kawuri, seguntes un testigo, a violéncia yera tan gran que "Garra casa yera de piet" e os terroristas, "més de médio centenar", fiço servir esplosivos e armas pesatas. No b’ha que olbidar que dende mayo de 2013 o norte de Nigéria se trova en estato d’emergéncia. No b’ha que olbidar que, seguntes a ONU, més de 1200 presonas son estatas asesinatas en Nigéria á mans d’es terroristas de Boko Haram.

FUENT

Qui quiera aduyar á os cristianos de Nigéria, que vaiga ta este VINCLO

A estratégia d'o $i$t€mⒶ

O corrupto sistema á o que somesos hi somos —o $i$t€mⒶ— no aspira á res més que á estar un sistema autopoietico, si hemos á fer servir a faramallosa e bofa paroleria de sociologos como Niklas Luhmann e parellanos.

O caso ye que o corrupto sistema á o que somesos hi somos —o $i$t€mⒶ— no dubda mica en destruir bels elementos suyos como respuesta á las perturbacions d’o médio ta que asinas, encara que o sistema cámbie estructuralment, o rete que fa permaneixca estable durant tota a suya esisténcia, mantenindo a identidat d’o mesmo —seguntes dicivan Maturana e Varela ta l’ambito d’a biologia— e que —seguntes as progecions que Luhmann prevó dimpués de fer servir ta os estúdios socials— seiga o própio sistema o que construiga os elementos que lo conforman.

O caso ye que, dende fa qualques semanas e como parte d’a campanya que o $i$t€mⒶ apresta t’as eslecions europeuas, imos veyendo diferents movimientos ta sayar d’achiquir una esferra en as votacions de mayo. Bels eixemplos:

1) Fa una semaneta se nunciava o naiximiento d’un nuevo partito, VOX, como alternativa á la decadéncia e ruina moral e economica que nos secute. ¿Alternativa? Prou que no. No solo hi son os de siempre —beluns encara nos ne alcordamos de quan o exministro d’a UCD Ignacio Camuñas feva campanya en favor d’a constitucion d’o 78 asegurando, entre atras muitas mentiras, que as autonomias enfortivan a unidat d’a Pátria, guaranciavan a igualdat de toz os espanyols e amilloravan l’alministracion en acercando-la á os ciudadanos— sino que esfienden os mesmos ideals que nos han feito arribar dica aquí: “VOX es un proyecto político para la renovación y el fortalecimiento de la vida democrática española” afirma justo en l’emprencípio o suyo manifiesto fundacional, quan ye precisament ixa vida democrática española a que nos ha traito esta postema que nos emponzonya. ¿Ta qué naix pues este partito? ¿Ta sacar-le votos á o PP? Me creigo que ye més bien ta espardir entre tres partitos —UPyD, Movimiento Ciudadano e agora tamien VOX— o malestar ent’o PP e fer esbafar a carranya ciudadana entre diferents opcions chiquirrinas que se presentan como regenaderas pero son controlatas per as mesmas mans que hue nos afogan.

Ademés, e per si alcaso, pareix que tamien participará n’as eslecions una atra fuerça politica: Podemos, empentata per lo televisivo Pablo Iglesias. Asinas, os descontentos con o PSOE podran trigar entre UPyD, Movimiento Ciudadano e esta nueva alternativa —IU no solo ye parte d’o sistema, sino que en ye uno d’os suyos alacez—. ¿Qué millor traça d’esfer-se d’a indignacion general que confiar-le-ne á un bamboso barbol? ¿Cal ricordar que mesmo Ruiz Mateos plegó en o parlamento europeu quan o PSOE de González yera o súmmum d’a corrupcion? ¿Per qué no podria fer-lo agora este atro aprendiz de clown? M’almira que no le’n haigan pidito á o Gran Wyoming? Encara les vaga.

2) E qué dicir de Gamonal. Independientement d’a raçon que os vicinos tenevan —e tienen— ta esfender-sen d’as cacicadas d’os suyos caporals, a verdat ye —en a mia opinion, claro— que los ha manipoliato dende a zurda e dende a dreita igual como manipolion —dende a zurda e dende a dreita­— o 15-M, que ya ni existe ni ilusiona ni menaça sisquiera.

Per un costato, se’n guardan d’a reaccion popular fendo-la esbellugar els —o $i$t€mⒶ— en chiquetas barallas inofensivas; igual como quan en a Guerra Freda os USA e a URSS provocavan numbrosos conflitos de baixa intensidat ta mantener o suyo status quo —¿qué se les davan á els os muertos en ixas guerras que ni titolars en a prensa per un regular mereixevan?— u como fa agora o NOM con tota mena de revolucions, guerras u atentatos terroristas.

Per un atro costato, movilizan á os suyos partidários. Mientres IU —ixe PSOE bis— ençuriza á las cricas suyas con os viellos lemas sanguinosos d’a guerra civil, o PP —ixe PSOE bis— ixorronta á las suyas ramadas con imágens de bellas decenetas de golagutans cremando contenedors mientres fan bailar trafallons tricolors. D’ixas carranyas e ixes miedos, bels votos en quitaran, pro á fes que sí.

3) E ta rematar, l’alborto. ¡Qué bestieças no hemos havito á sentir estes dias! E de nuevas, ta movilizar partidários d’as dos caras d’o $i$t€mⒶ.

Asinas, tota a oposicion —parlamentária e extraparlamentária— desagera o suyo desagerato aquelarre infanticida, fa mover á las suyas mullerotas e homenoz en esfensa d’una sobirania d’o cuerpo. ¿Que qué ye ixo? Pos que yo puedo fer con o mio cuerpo o que me pete. Mesmo  —e si me lo pide o body— matar atros cuerpos. Perque claro, á estes homenoz e mullerotas no les charres de l’alma, que els son uns desalmaus.

Tanimientres, o guvierno d’a nacion —e as suyas organizacions/agendas de colocacion satelites— presenta como una fita d’a esfensa d’a vida un progecto de lei que refirma e confirma a lei de 1985. Per si alcaso, apareixen bellas voces respuleras en o própio PP ta fer creyer —bueno, Mariano ye un buen hombre que fa o que puede á pesar d’as circunstáncias— que este mal ye un mal menor. ¡Qué digo mal menor! ¡Este progecto de lei que refirma e confirma a lei de 1985 ye una fita n’a esfensa d’a vida! ¿No hez visto alcaso a manifestación d’este cabo de semana en París? Somos a envídia d’a civilizacion occidental.

Á la finitiva e tornando ta l’emprencípio pero sin fer servir o bofo parlage d’a sociología: 

Se vogliamo che tutto rimanga come è, bisogna che tutto cambi. 

Giuseppe Tomasi di Lampedusa Il Gattopardo (1958).

Ixa ye a estratégia d’o sistema: Si queremos que tot contine como ye, cal que tot cámbie. No asperez que o $i$t€mⒶ permitirá garra reforma que menace sisquiera a suya identidat, a suya eséncia. Solo que o Reino de Dios nos ferá libres. Mesmo un autor tan poco cristiano como Wells reconeixió:

This doctrine of the Kingdom of Heaven, which was the main teaching of Jesus, and which plays so small a part in the Christian creeds, is certainly one of the most revolutionary doctrines that ever stirred and changed human thought.

H. G. Wells, The Outline of History (1920).

[Esta dotrina d'o Reino d'os Cielos, que ye a ensinyança principal de Gesús e que no fa que una chiqueta parte en o credo cristiano, ye ciertament una d'as dotrinas més revolucionárias que nunca haiga feito esbellugar e transformar o esmo humano].

Amanemos o Reino de Dios. Tot atro quefer ye perdemés.

Donacion d'un manuscrito d'o sieglo XIII con parte d'o testo d'os Fueros d'Aragon

A Biblioteca Nacional de España ha recibito como donacion un manuscrito de metat d’o sieglo XIII, escrito en romance aragonés, que contiene una parte d’o testo d’os Fueros d’Aragon aprevatos en 1247 e que representa a cópia més antiga dica agora coneixita d’a devantdita obra.

Este manuscrito, de gran interés t’a Biblioteca Nacional de España, enamplará o suyo património decumental, dau que conta entre os suyos fundos con una representacion important de fueros generals e conserva, en o Servicio de Manuscritos e Incunables, o Mss/458 d’o sieglo XIV, amplament estudiato per Gunnar Tilander, e que se podeva considerar, dica altalle, o testimónio més antigo conservato en esta biblioteca d’os Fueros d’Aragon, pos a resta d’as manifestacions en son d’o sieglo XV.

O manuscrito ye estato entregato per Miguel Carabias Orgaz, licenciato en Filologia Hispanica per a Universidad de Salamanca e profesor de Lengua Española y Literatura. “Un documento como éste, debe estar en una institución pública a disposición de todo aquel que lo quisiera investigar”, asegura.

Podemos trobar un estúdio més amplo sobre o manuscrito e o proceso de transmision d’os Fueros d’Aragon en: Miguel CARABIAS ORGAZ, “Los Fueros de Aragón. Una versión romance de mediados del siglo XIII”, Revista de Filología Española, XCIII, 2º, julio-diciembre, 2013, pp. 313-326.

Si querez leyer a nota de prensa original, punchaz AQUÍ.

Si querez més informacion sobre o manuscrito, punchaz AQUÍ.

O património de nuevas

Encara que no dixa d’haver-bi de noticietas sobre a baralla d’os biens aragoneses retenitos en Catalunya, feva muito que no escrivive mica sobre l’afer d’o nuestro patrimonio religioso seqüestrato en o Museu de Lerida. Asinas que aproveito a informacion que viene hue n’a prensa —á lo menos en l’aragonesa­— ta esbellugar a qúestion en a bitacora.

Seguntes pareix, o Papa Francho será informato á finals de febrero d’a situacion d’o litígio eclesiastico entre as diocesis de Balbastro-Monçon e Uesca con a de Lerida per lo património que se troba en o museu d’a ciudat catalana. Será durant la visita ad limina Apostolarum que congregará á la mayoria d’os bispes espanyols en o Vaticano, an que feran a parola con o Pontifice e bels caporals d’a Ilésia.

Alfonso Milián, bispe de Balbastro-Monçon e Julián Ruiz, bispe de Uesca, participarán en dita visita, que que se ferá entre o 25 de febrero e o 8 de março. Durant a suya estada á Roma, s’entrevistraran, ademés, con Pietro Parolin, o nuevo secretário d’Estato d’o Vaticano e buen coneixedor d’a baralla entre Aragon e Catalunya. Dimpueas, durant a trobata que tendran con o Papa Francho, l’informaran d’a situacion d’as suyas diocesis e feran mencion esprisa d’este pleito. Será a primer vegata que os bispes d’as diocesis altoaragonesas participen á un Pontífice un problema que fa rabosa dende més de 15 anyatas. Ni con Juan Pablo II —que baixo o suyo mandato fiço garras o pleito— ni con Benedicto XVI b’havió oportunidat d’exposar esta situacion, encara que sí que b’havió muitas entrevistas con es diferents núncios que b’ha havito en Espanya e con l’anterior secretário d’Estato d’o Vaticano, Tarsicio Bertone. Con tot e que en totas as ocasions as autoridaz vaticanas dion a raçon á las demandas aragonesas as autoridaz catalanas —igual civils como eclesiasticas— se negon a fer l’adempríbio.

O PPSOE, l'alborto e os que se dixan enganyar

Si en ye de menuta a inmoralidat d’o PP, que no han tardato ni média en fer burro falso e empencipiar á reconsiderar a suya posicion —vergonyosa de tot— respective á la lei de l’alborto. Posicion que se resume fácilment: matar en qualques ocasions ye licito e mesmo neseçário. No satisfeitos con ixa bestieça, muitos barons han feito publico o suyo refús. Se coneix que les pareix millor que una muller pueda matar á o suyo fillo no naixito siempre que le pete. Pos bien, o própio Rajoy —que ta atras muitas cosas ni tartir gosa— ya ha dito que prevará de trobar un consenso ta amillorar l’avantprogecto de lei. Guarda si en ye de bueno Mariano!

Qué feran agora os pepers que se creyevan que o suyo partito esfendeva o dreito á la vida? Sisquiera m’entivoque pero continaran fendo a gatatumba. Como siempre, que a inmoralidat e febleça d’o PP no ye mica nueva.

En Aragon, per si á belun se le da un poquet, Luisa Fernanda Rudi ya ha feito publico o suyo desalcuerdo con a reforma. Á ella le feva goyo a lei socialista de 1985. Qué feran agora os pepers que se creyevan que, en votando á Rajoy, votavan cuentra Rodríguez Zapatero e, en realidat, en votando á Rajoy, votavan per Felipe González? Sisquiera m’entivoque pero continaran fendo a gatatumba.
Perque, no me digaz que no estaria bien que o PP s’estalapiçás en as esleccions europeuas? No ta que rectifiquen, que prou que no lo feran, si no per lo conuerto de que muitos perdesen o cargo e a participacion en os presupuestos. Igual mesmo me repienso o costumbre mio de no votar nunca.



Dos de ginero

O 2 de ginero de l’anyo 40 d’o Nuestro Sinyor, a Santiça Virgen Maria, dinantes de puyar t’o cielo en Gerusalem, en carne mortal ta Zaragoça hi fue, á refirmar-bi á l’apóstol Sant Jaime.

O 2 de ginero de l’anyo 1492 d’o Nuestro Sinyor, os Reis Catolicos enamplon a Reconquista d’as Espanyas e astralion a feita emprencipiata per don Pelai, ent’a part de l’anyo 722 d’o Nuestro Sinyor, remantando asinas e á la fin con güeito sieglos d’ocupacion musulmana e creando l’alacet d’o Império Espanyol que no solo nos tornó o suénio d’a monarquia visigoda, sino que l'engrandió, e a nuestra cultura e a fe catolica per toz os cavos d’o mundo espardió.

Ye menister ricordar-lo siempre. Ye menister ricordar-lo hue, en l’anyo 2014 d’o Nuestro Sinyor, quan a Pátria sofre una d’as puendas més foscas, tristas e vergonyosas d’a suya gloriosa história.