Zaragoça per a vida

Tamien ahiere, festividat d'os Santos Innocents, se fiçon en Aragon concentracions en esfensa d'o dreito a la vida e cuentra o crimen de l'alborto. En veyendo o siléncio d'os meyos de comunicacion, mesmo es regionals, sobre ditas actuacions, traduzco a informacion que sobre a concentracion de Zaragoça apareix en a pagina d'Alternativa Española, partito que ha convocato concentracions parellanas en atras ciudaz espanyolas.

O 28 d'aviento se fació, un atro anyo, una concentracion devant d'a clínica albortista Actur.
L'acto, convocato per Alternativa Española e a Plataforma Cívica de las Familias Cristianas, fue a las 19:30, a o mesmo tiempo que se producivan atras quince concentracions devant d'atras tantas clínicas albortistas d'atros puntos d'Espanya.
En o transcurso d'a concentracion se charró d'a nesecidat de refirmar a las mairs per parti d'as alministracions, ademés d'a nesecidat d'informar e explaniquiar clarament qué ye l'alborto e a drama que supone ta una muller.
Como coda, uno d'os asistents leyó un manifiesto an que s'instava a o nuevo guvierno de Mariano Rajoy a estar valient e rematar con l'alborto en Espanya, a fomentar as aduyas a la maternidat e l'adopcion e animava a os presents a no revlar en a luita per lo dreito a la Vida.
(Fuent: Alternativa Española)

Manifiesto per a derogacion d'a "Lei de Memória Historica"

Esta humil bitacora comparte —si no tot, buena cosa sí— o manifiesto que o Foro Historia en Libertad ha feito publico e que contino se i traduz ta l’aragonés per si belun se i quiere adivir:

Quatre anyatas dimpuesas d’a suya promulgacion, o Foro Historia en Libertad  quiere fer un clamamiento publico ta aconseguir a derogacion d’a clamata Lei de Memória Historica (Ley 52/2007, de 26 de diciembre, por la que se reconocen y amplían derechos y se establecen medidas a favor de quienes padecieron persecución o violencia durante la Guerra Civil y la Dictadura).

Sin responder a una verdadera nesecidat en o suyo origen, nos creyemos que l’efecto de l’avantdita mida ye estato afundar as diferiéncias entre os espanyols, resucitar ódios ya rematatos e reubrir unas feritas que yeran cicatrizatas tiempo have. Tot ixo perque o suyo espritu ye presidito per un deseyo de revancha que falsifica o proceso historico en sintonia con nesecidaz politicas que no han res a veyer con a História.

Como no pueden fer-sen “verdat historica” —a traviés d’o BOE— qüestions que son sogetas a la opinión d’es profesionals d’a matéria, o Foro Historia en Libertad refusa per prencípio que qualsiquier parlamento u organizacion allena a las instáncias historicas u intelectuals s’atribuiga competéncias sobre a matéria. Tampoco no podemos compartir as presions que se son feitas enta institucions d’esta naturaleça como a Reyal Académia d’a História.

A diferiéncia d’atras posicions que no compartimos, no ye a nuestra intencion prescribir l’oblido como actitut d’os espanyols devant d’o pasato. Tot o contrário, pretendemos que se ricuerde a História, ixo sí, con dos puntualizacions neseçárias: que esta s’asuma integrament, e no dende una envista de parti; e que o pasato no faiga parti d’o debate politico sino que permaneixca en os terminos que pertocan a la suya naturaleça.

L’anterior Guvierno e os suyos sócios parlamentários creon a ficcion de que o sistema politico valero fa forcallo con a presunta legalidat d’a II Republica, aladiando o verdadero origen d’a present situacion. E, en qualque aspecto, se logron reproducir bels caracteres sectários e totalitários de l’avantdito regimen republicano que han menaçato con rinovar belun d’os més disgraciatos episódios d’a nuestra história contemporánia.

Estraliata dita pretension en as urnas o zaguer 20 de noviembre, nos creyemos que no b’havrá regeneracion posible ni Espanya logrará salir d’a funda crisis an que bi ye (e que va muito dellá d’o economico) si —entre atras midas— no se procede a fer marchar as ainas parlamentárias que permitan a inmeyata derogacion d’a mal clamata Lei de Memória Historica.

Ademés, ta privar una contina inércia en os critérios aplicatos en este campo, proponemos que se faigan os trangos neseçários ta que os usos publicos d’a história seigan ogeto d’una legislacion d’alcuerdo con o que ocurre en os païses d’a nuestra redolada, de traça que as iniciativas guvernamentals a o respective queden a la marguin d’as consignas d’os partidos e no se permita una restriccion a las libertaz publicas que vaiga dellá d’a proteccion d’es dreitos d’a verdat e l’honor.

Si belun quiere leyer o texto original u saber qualcosa més sobre o Foro Historia en Libertad  no ha sique punchar sobre este vinclo.

Per qué no te callas?

O perjuro que s’entrepuça con as puertas d’o suyo palácio recullió ahiere una grandiça ovacion de parte de bels seicientos privilegiatos que viven, tamien els, como reis á penar d’a crisis que han contribuyito a trayer.

O nuevo Herodes —més d’un millon e médio d’albortos feitos grácias á las leis que, satisfeito e de buen implaz, ha firmato l’abraçador d’asesinadors— mesmo s’emocionó devant d’o carinyo que l’amonstron os que treballan, tamien els, per crepar Espanya.

L’amigo d’os Albertos, de Mario Conde u de Manuel Prado y Colón de Carvajal, no saveva si plorar u esmelicar-se-ne per a reaccion que o suyo mensage d’austeridat e decéncia prevocó en os que s’ajuntan con empresários en benzinerias, s’enreligan en retes de correyas e bigoz u se benefícian con os diners d’os ERE.

O suegro d’Urdangarin charró d’a confiança en as institucions mientres os seicientos privilegiatos pensavan en qué nuevo fiscal general podevan nombrar u á quí proposar como nuevos miembros d’o Tribunal Constitucional ta que se hi contine aprevando reformas estatutárias, legitimando partitos pro-etarras u sinyalando a constitucionalidat d’as unions aberrosexuals.

O que se’n fa a rialleta quan parla con os independentistas, ascuitó ploramicoso os chilos de viva el rey (sic) que, devant d’as suyas sinceras parolas de patriotismo, no pudon privar os que pactan, tamien els, con separatistas.

Á la fin, l’almirador de Rodríguez —aconortato per l’amor que le profesan os que s’enriqueixen grácias á o sistema que a suya traiduria nos impuso— se’n tornó t’o suyo palácio a siguir entrepuçando-se con as puertas.

Reço

Reço per es nuestros germanos. Es nuestros germanos de Nigéria, es nuestros germanos d'Egipto, es nuestros germanos de Palestina, es nuestros germanos de China, es nuestros germanos de Coreya d'o Norte, es nuestros germanos d'Iraq, es nuestros germanos d'a Índia, es nuestros germanos de Somália, es nuestros germanos d'Eritreya, es nuestros germanos de Paquistan, es nuestros germanos d'Iran, es nuestros germanos de Turquia. Reço per toz es catolicos engalçatos per l'islam, per lo comunismo, per l'hinduïsmo, per lo sionismo. Reço per toz os catolicos que, con o suyo sacrifício, nos ensenyan a vivir a fe con o goyo e a valentia neseçária. Reço perque en 2012 o mensage de Cristo contine alimentando l'asperança en toz os cantons d'o mundo. Reço perque se dixe d'asesinar a os que testimónian ixa asperança. Reço perque a nuestra indiferiéncia no nos faiga complices de toz ixos crimens.

O concello d'Almassora rectifica

Como decive en atro mensage, cal reconeixer os aciertos. Ve-te-me un atra iniciativa d’o PP que cal aplaudir: l’avenita d’Almassora que se clama Avinguda de la Corona Catalanoaragonesa (sic) pasará a clamar-se, dende l’1 de ginero, Avinguda de Híjar. L’alcuerdo lo prenió ahiere o concello con os votos favorables d’o PP, que presentava a iniciativa, e d’o Bloc, que la refirmó encara que en 2003 yera estato un d’os partitos que adopton a enatiça denominacion devantdita. ¿Saben vustés quí se i opuson? Prou que sí: o PSPV. O suyo portavoz, Joan Antoni Trenco, afirmó, sin mica vergüenya, que o termino Corona Catalanoaragonesa ye historico de tot e que asinas apareix en qualsiquier manual d’a ESO (no, no se’n ridan vustés de l’argumento d’autoridat alportato) u en a Enciclopédia Catalana (tampoco no se’n ridan, per caridat), an que, sinyaló l’erudito socialista “no apareix o nombre Corona d’Aragon”.  Increyible pero cierto. Manimenos, ¿qué podeva asperar-se d’un partito que se fa clamar Partit Socialist del País Valencià?

Vixca lo Regne!

Amargosa memória

Quan o PP fa qualcosa buena, bi ha que reconeixer-les-ne, encara que la faigan a retepelo. Asinas que, esta vegata, aplaudo a iniciativa  d'a consellera de cultura d'o guvierno regional de dixar de financiar o programa Amarga Memoria (sí, amargosa memória) que, dende 2004, malfurriava os nuestros diners en fomentando l'ódio e a mentira. Si creyen que desagero, pueden leyer as asociaciacions e particulars beneficiários d'as subvencions en 2011 e os progectos que fevan:

-Javier Escartín Sesé: Investigación “Memoria oral y gráfica de la asistencia social aragonesa” 2.080,00 €

-Gabriela Sierra Cibiriain: Investigación “La transición en Aragón. Entrevistas para la reflexión” 5.760,00 €

-Fundación Sindicalismo y Cultura: Publicación “Comisiones Obreras” de Miguel Ángel Zamora Antón 4.000,00 €

-Sergio Calvo Romero: Investigación “Una década de oposición estudiantil en Zaragoza, 1965-1975” 2.796,00 €

-Asociación Cultural Más Faena: Documental “Una higuera sin hojas” 8.000,00 €

-Fundación Bernardo Aladrén: Publicación “Sindicalismo y magisterio en la FETE durante la II República en Aragón” 7.760,00 €

-José Ángel Ramírez Compés: Exposición “Memoria, exilio y deportación” 5.840,00 €

-Asociación para la recuperación de la memoria histórica de Aragón: Jornadas nacionales sobre la recuperación de la memoria histórica en Zaragoza 10.660,00 €

-Francisco Javier García Calvo: Investigación sobre expedientes que afectan a bienes muebles durante la guerra civil y la posguerra realizados por el servicio de defensa del patrimonio nacional 7.899,73 €

(Fuent: BOA 111, 08/06/2011).
Per no charrar d'as conferéncias, jornatas e congresos organizatos, es libros e audiovisuals editatos, as exposicions amontatas u as subvencions conceditas a concellos e comarcas (no solo per lo guvierno regional, tamien per as diputacions provincials) e que fan puyar l'amiro de diners malfurriatos dic'a obscenidat més absoluta (leigan vustés os datos d'a própia conselleria en o suyo puesto oficial)

O unico que me pena d'a decision d'a consellera ye que l'haiga presa exclusivament, ella mesma ha quiesto dixar-lo muito claro, per raçons economicas, no pas ideologicas.

L'aclaracion yera escusata, prou sabévanos que o PP no tiene garra valura que esfender.

La pela és la pela

En a zaguera dentrata que escrivié sobre os biens sacros aragoneses retenitos ilegalment en Catalunya, decive que  “este ye un afer que, igual como ixas larguiças séries que aborreixen as tardis televisivas, puede recuperar-se dimpués de bels meses sin garra problema, tot contina como dinantes, como quan lo dixés.”  Pos m’entivocave: a manca de vergüenya de bels bispes catalans no coneix mida e supera tot l’esmaginable. Leigan vustés a zaguer notícia sobre o tema.

L’avogato Jorge Español, que representa os concellos de Berbegal, Peralta d’Alcofea e Villanueva de Sigena, denunciará á o Bispato de Lerida per cobrar, siempre presuntament, 20.096,08 euros per diferents servícios feitos á o Museu Comarcal e Diocesano de Lerida, entre atros l’asesoramiento juridico. Presenta como preva l’avogato una factura emitita per lo bispato o 23 d’aviento de 2002 cuentra o museu per l’asesoramiento juridico-alministrativo, d’investigacion historica e per a esfensa d’a integridat d’a coleccion artística d’o museu entre l’1 de ginero e o 23 d’aviento de l‘anyo devantdito. Esta decumentacion ha apareixito durant a investigacion feita per lo Juzgato d’Instruccion numbro 2 de Lerida respective á las supuestas subvencions recibitas per lo museu.

Ye menister ricordar que, entre atras cosas, o Bispato de Lerida, una entidat canonica sin animo de lucro, no puede fer servícios juridicos retribuyitos, e menos sin cobrar a IVA (que ni sisquiera apareix en as facturas), perque l’asesoramiento juridico en Espanya ye un quefer exclusivo d’es avogatos e bi ha que estar dato d’alta en o impuesto d’actividaz economicas ta desembolicar-lo. Seguntes Jorge Español, as facturas no las firma garra avogato, sino Juan Ramón Ezquerra, mosen e vicário general d’o bispato leridano.

Me pareix simplament inalmisible que l’alministracion publica catalana no faiga servir os suyos servícios juridicos e pague diners á qui no deve per unas funcions que no puede exercer. A Lei de Subvencions vieda de tot subvencionar l’asesoramiento juridico, pos cada un ha á pagar-se os suyos própios pleitos. E ye més que triste o que sinyala Español: Queda claro, con estas facturas, que el origen del problema no son las administraciones públicas, como el Obispo Piris viene proclamando, sino el mismo Obispado de Lérida, verdadera punta de lanza del problema, que hasta cobra a las administraciones públicas para evitar la devolución de las piezas al Obispado de Barbastro-Monzón.

Ye triste e increyible que o Bispato de Lerida cobrás −presuntament− á las mesmas administracions catalanas ta privar a tornata d’os biens aragoneses á suyos duenyos, qualcosa contradictória de tot con os mandatos recibitos d’a Santa Siede.

Buen Nadal 2011

Estianyo, como felicitacion de Nadal, un villancico de donya Ana Francisca Abarca de Bolea, d'o suyo libro Vigilia y octavario de San Juan Bautista (Zaragoza, 1679), que, como ya sabez incluyiva bellas composicions en aragonés, qualcosa que, disgraciadament, tampoco no yera guaire habitual en o sieglo XVII.

Albada al nacimiento

Media noche era por filos,
as doce dava el reloch,
quando ha nagido en Belén
vn mozardet como vn sol.

Naçió de vna hermosa Niña,
virgen adú que parió,
y diz que dexó lo cielo
por este mundo traydor.

Buena gana na tenido
pues no len agradejón
aquellas por qui lo fizo
y bien craro lo beyó

En fin, naçió en vn pesebre,
como Llucas lo dizió,
no se enulle si le dizen
que en as pallas lo trobón.

Dízenlo Pasqual y Bato,
Bras y Chil y Mingarrón
y lo mayoral Turibio
que ellos primero lo bión.

Llevaronle os pastores
de crabito y naterón
dos mil milenta d'aquellas
de que o Niño se folgó.

Entre vn buey y entre vna azembla
con muyto goyo nazió;
aunque de ver tal socesso
diz que Ababuc se espantó.

O santo viello Chusepe
contento estava, por Dios,
adú que antes estió triste,
porque no trobó mesón.

Listos andan os ancheles,
del cielo al suelo vajón
cantando: "Gloria en os cielos
y paz en a tierra a toz".

Toz la claman buena noche,
dirálo la colazión
y lo tizón de Nadal
que ye nombrado tizón.

Diránlo los villanzicos
y diránlo los cantors,
dirélo yo que m'enfuelgo
de repiquetiar a voz.

A su madre y a Chusepe,
pus lo merezen os dos,
darezle a norabuena
deste fillo que tenión

Tamien podez ascuitar a version que d'o villancico en fiço a Orquestina del Fabirol en o suyo disco Albada al Nacimiento (Zaragoza, 1996).

Lo dito: buen Nadal, amigos, ta vusatros e os vuestros.
En Cristo Rei un abraço.

Més vergüenyas d'o PP

No, no charraré de cómo o PP fináncia as clinicas abortistas en as comunidaz an que guvierna (que en son muitas). Ni sisquiera charraré d'o juício d'os trages (¿no b'heva atras raçons ta judgar a Camps u qué?). No, no'n charraré pas. Charraré d'atras dos qüestions, talment menors, pero que refleixan prou bien a falsedat d'o patriotismo d'o PP (per si belun encara se crei que o PP ha esfendito nunca a nacion espanyola).

Charraré de cómo s'agenullan Arenas e Zoido devant d'o molimento a l'apostata e anti-espanyol Blas Infante e l'homenagean como pair d'a pátria andaluça. Charraré de cómo Zoido, en ixe mesmo homenage, se define como nacionalista andaluz e fa buena pacha con a filla de l'infame (que, cómo no, preside una fundacion con o nombre de su pair). Charraré de como bi esfendevan ixe drapo que claman bandera e andaluça. Charraré de cómo ofienden a história e a dignidat d'os andaluces de bien.

Dimpués beluns s'almiran de o PSOE seiga estato lo partito més votato en a província de Sevilla. Seran os mesmos que ni tartion quan o PP votó a reforma d'o estatuto d'Andalucia an que se declarava a l'infame Blas, oficialment, pair d'a pátria andaluça. Os mesmos que aplaudion quan Arenas fació una vehement esfensa de Blas infame devant d'uas declaracions radiofonicas de Vidal-Quadras

Charraré tamien d'una avenita que bi ha en Almassora (Castellon) e que se clama avinguda de la corona catalanoaragonesa. Sí, han leyito bien:  corona catalanoaragonesa. E en Almassora,que estió reconquistata per lo rei Jaime I qui, o 15 d'agosto de 1237, le concedió fueros e costumbres de Burriana; cal ricordar que o mesmo rei concedió a Burriana a suya carta puebla a fuero de Zaragoça.
¿Saben qui guvierna dende fa decadas en o concello d'Almassora? Sí, o PP; ixe partito que tanto ama a Espanya.
Ye a hora d'a reaccion.

Ave Maria, gratia plena

Prou que, como catolico e espanyol, yo no celebré garra fiesta ahiere. Prou que, como catolico e espanyol, yo celebraré manyana a fiesta d’a Inmaculata Concepcion d’a Virgen Maria. Perque manyana ferá 157 anyos que o Papa Pio IX proclamava, como dogma de fe de traça definitiva, o que a tradicion popular veniva sustenendo dende l’empencípio d'a Ilésia:

Declaramus, pronuntiamus et definimus doctrinam, quae tenet, beatissimam Virginem Mariam in primo instanti suae conceptionis fuisse singulari omnipotentis Dei gratia et privilegio, intuitu meritorum Christi Iesu Salvatoris humani generis, ab omni originalis culpae labe praeservatam immunem, esse a Deo revelatam, atque idcirco ab omnibus fidelibus firmiter constanterque credendam. 

(Ineffabilis Deus, 8 d'aviento de 1854)

Per lo que fa a la história d’a nuestra nacion, nos trobamos que, ya en o XI Concílio de Toledo, o rei visigodo Wamba se titolava «Esfensor d’a Puriça Concepcion de Maria», fendo asinas una tranya que siguirian atros muitos reis hispanos. Monarcas como Fernando III o Santo, Jaime I o Conquistador, l’emperador Carlos I u o suyo fillo Felipe II estion fiels devotos d’a Inmaculata e portion o suyo sinyal n’as suyas campanyas militars. 

En 1384, don Juan I, rei d’Aragon, mandó que se celebrás a fiesta d’a Concepcion Inmaculata en toz os estatos d’a suya obediéncia liberatos d’o juvo islamico.

Dende o sieglo XIV b’ha en Espanya referéncias de cofradias naixitas en honor á la Inmaculata. Os Reis Catolicos don Fernando e donya Isabel yeran cofrades d’a Cofradia d’a Puriça Concepcion d’a Preservata Virgen, e lo estion igualment muitos atros monarcas, como o suyo nieto Carlos I, Felipe V, Fernando VI, Carlos III u Car1os IV. Per ixo no ye d’almirar que toz os reinos d’as Espanyas celebremos a Inmaculata como patrona e protectora dende 1644.

Sanguis martyrum, semen christianorum est

Hue ye o cabo d’anyo d'o fusilamiento d’o dramaturgo espanyol Pedro Muñoz Seca, asesinato per as fuerças republicanas en a matança de Paracuellos. O suyo crimen: estar catolico. 

Igual como el, e solo que en Paracuellos, 8354 mártirs estion executatos. O numbro lo da L’Archivero-Historiador d’a Real Academia de la Historia, Arsenio de Izaga, en a suya obra Los presos de Madrid. Recuerdos e impresiones de un cautivo en la España roja (Madrid 1940). 

De Izaga, preso en a Cárcel Modelo −an que estió testigo d’as sacas d’os dias 7, 8 e 9 de noviembre− e evacuato dimpuesas t’a Cárcel de Ventas, nos ha dixato en ixas paginas un eixemplificador testimónio d’a valura de toz aquels mártirs:

“Ninguno renegó de sus convicciones religiosas y patrióticas. Ninguno dio la más leve prueba de vacilación ni de flaqueza. Todos se negaron a prestar adhesión al régimen que los estaba envileciendo, a pesar de que se les ofrecía como único medio de salvarse. Todos se animaban entre sí, y oponían a las blasfemas imprecaciones de sus verdugos, su fe de creyentes y su altivez de españoles. Todos recibían la helada caricia de las balas como el galardón eterno que el Cielo les tenía prometido y el beso que la Patria imprimía en sus frentes de Cruzados. Y no se había extinguido el eco de la última descarga, cuando aún resonaba en el espacio su vibrante grito, ¡Viva Cristo Rey! ¡Viva España!."

Agora, quan no fa que tres dias que o guvierno en funcions de Rodríguez ha concedito atros 5.6 millons d’euros a ixas asociacions que fan pocha de l’ódio e a mentira, ye menister que toz nusatros honremos a verdat. Espanyols, perdonaz; pero no olbidez:

Adiós pPSOE, bienvenito PPsoe

Bueno, prou que ixo de bienvenito no ye que una licéncia literária. Igual como l’adiós d’o pPSOE tampoco no ye una ita. Perque, e ixo ye o grau, aquí no se’n va dengun. Aquí se’n quedan toz. Á siguir estricallando a Pátria.

Ya lo diciva Giuseppe Tomasi di Lampedusa en Il Gattopardo: Se vogliamo che tutto rimanga come è, bisogna che tutto cambi. Ixe ye o lema d’o sistema: Si queremos que tot contine como ye, cal que tot cámbie. Tenemos devant atras quatre anyadas ta siguir esvolustrando-nos en o fiemo, ta siguir alfonsando en a vasuera, ta siguir espiritando en a mierda. E ya en van trenta e seis, dende ixe atro 20-N.

Torna o PPSOE, perque nunca no se’n ye ito. No ye a hora de l’asperança bofa, d’o goyo infantil, de l’autoenganyo simplot. Ye a hora d’a reaccion,

Tres Asayos Sencillos de Maurin

Encara que, intelectualment, a obra de Peter Maurin ye pro més inferior que a de pensadors de l’altária de Chesterton u Belloc −á qui pren como alacet d’a suya envista d’a economia−, vitalment o suyo heréncio ye digno d’acobaltar.

Naixito de Burdeus en 1877, Peter Maurin estió o caganiedos d’una família de labradors pobres d’o sur de Fráncia que tuvon 21 fillos. Emigró ta Canadá en 1908, d’an que pasó t’os Estatos Unitos ta, á la fin, acoflar-se en Nueva York, an que vivió dic’a suya muerte en 1949.

En o periodico The Catholic Worker, que emprencipió á editar en 1933 junto á Dorothy Day, publicó una série de chiquetas composicions, que clamó Easy Essays. Con estes textos, breus e de buen leyer, aduyó á espardir en Norte America o distributismo d’es devantditos Chesterton e Belloc e a doctrina social d’a Ilésia inspirata en a Enciclica Rerum Novarum d’o Papa Lion XIII.

Dellá d’a suya valura literária, o contenito moral d'os Asayos Sencillos fa que sigan estando chiquetas reflexions plenas d’actualidat. Ve-te-me tres eixemplos:

O QUE FA A L’HOMBRE HUMANO.
1. O dar e no lo prener
Ixo fa á l’hombre humano
2. O servir e no lo guvernar
Ixo fa á l’hombre humano
3. L’aduyar e no l’aplanar
Ixo fa á l’hombre humano
4. L’alimentar e no l’avalar
Ixo fa á l’hombre humano
5. E si ye menister
O morir e no lo vivir
Ixo fa á l’hombre humano
6. Es Ideyals e no es alcuerdos
Ixo fa á l’hombre humano
7. O Credo e no l’angrúcia
Ixo fa á l’hombre humano
WHAT MAKES MAN HUMAN// 1. To give and not to take/ that is what makes man human. / 2. To serve and not to rule/ that is what makes man human. / 3. To help and not to crush/ that is what makes man human. / 4. To nourish and not to devour/ that is what makes man human./ 5. And if need be/ to die and not to live/ that is what makes man human./ 6. Ideals and not deals/ that is what makes man human. / 7. Creed and not greed/ that is what makes man human. //

ILÉSIA E ESTATO
A sociedat moderna creye
en a deseparacion d’a Ilésia e o Estato.
Pero es jodigos
no hi creyevan,
es griecos
no hi creyevan,
es meyevals
no hi creyevan,
os puritanos
no hi creyevan.
A sociedat moderna ha deseparato
a Ilésia d’o estato,
pero no ha deseparato
o Estato d’o negócio.
A sociedat moderna no creye
en un Estato d’a Ilésia,
creye
en un Estato de l’hombre de negócios.
“E ye a primer vegata
en a história d’o mundo
que l’estato ye controlato
per es hombres de negócios,
dice James Truslow Adams.
CHURCH AND STATE// Modern society believes/ in separation of Church and State./ But the Jews/ did not believe in it,/ the Greeks/ did not believe in it,/ the Medievalists/ did not believe in it,/ the Puritans/ did not believe in it./ Modern society has separated/ the Church from the State,/ but it has not separated/ the State from business./ Modern society does not believe/ in a Church’s State;/ it believes/ in a business man’s State./ “And it is the first time/ in the history of the world/ that the State is controlled/ by business men,”/ says James Truslow Adams.

SECULARISMO
Quan a religion no tiene res á veyer
con a educacion
a educación no ye que informacion
plena de feitos
e lasa d’entendimiento.
Quan a religion no tiene res á veyer
con a politica
a politica no ye que partidismo—
“Saquemos á es barfulaires
ta que puedan dentrar os buenos amigos nuestros”.
Quan a religion no tiene res á veyer
con es negócios,
es negócios no son que mercantilismo.
E quan a religion no tiene res á veyer
con a educación, a politica u es negócios
se tiene á la religión d’as cosas ocupando
o puesto d’as cosas d’a religion
SECULARISM
When religion has nothing to do with/ education,/ education is only information,/ plenty of facts/ and no understanding./ When religion has nothing to do with/ politics,/ politics is only factionalism—/ “Let’s turn the rascals out/ so our good friends can get in.”/ When religion has nothing to do with/ business/ business is only commercialism./ And when religion has nothing to do with/ either education, politics or business,/ you have the religion of business taking / the place of the business of religion.

Pérez vs. Rajoy

No, no charraré d’o debate d’esta nuet. Encara que o debate ixe nos coste 550.000 euros, no’n charraré pas. Entre atras cosas, perque esta nuet no b’havrá garra debate. Esta nuet b’havrá, como muito, dos monologos —con pro menos grácia que os charraços d’o club d’a comeya— entre dos amiguez que se pareixen arrienda. Dos amiguez que como dos gotichonas d’augua se pareixen. Tanto se pareixen que quasi clons i son. Fez-le, si no, una golladeta á o suyo curriclo. Mira-tos, per eixemplo, es cargos que han ocupato n’o Guvierno d’Espanya. Estes dos —e con parellana e apatusca estrúcia— son estatos vicepresidents, ministros d’a presidéncia, ministros d’educacion, ministros d’interior. Asinas tiene a nuestra jovenalla o livel educativo que tiene. Asinas tienen as nuestras carreras o livel d’inseguridat que tienen. Conque no, no charraré pas d’o debate d’esta nuet. Entre atras cosas, perque esta nuet no b’havrá garra debate. Esta nuet b’havrá, como muito, dos monologos —con pro menos grácia que os charraços d’o club d’a comeya— entre dos amiguez que no no han feito atra cosa que vivir —folgadament e durat anyatas— d’a politica. Dos amiguez que no coneixen mica a situacion d’o país que han contribuyito á estricallar, a situacion d’o país que —de buen implaz e de conjunta—siguiran estricallando á partir d’o vinte de noviembre. Dos amiguez que se’n rediran —de buen implaz e de conjunta— de toz nusatros durant anyatas. Igual como se’n vienen esmelicando dende fa decadas. Pérez vs. Rajoy? Pérez=Rajoy! Mala cendella los creme.

Toz os Santos

Mientres beluns, os que olbidan as suyas radices e a suya eséncia negan, feran de nuevas o rediclo, esta vegata con a fateça ixa de Halloween, muitos de nusatros celebraremos a Nueit de Difuntos e o dia de Toz os Santos como se mereix, conna solennidat de siempre.

Muitos de nusatros honraremos á os nuestros muertos e nos feremos contentos perque viven ya con Dios. Ricordaremos á ixos hombres e mullers, de tot tiempo e puesto, que han luitato con rásmia ta siguir o camin enta Dios. Reflexionaremos sobre l’eixemplo d’os Santos Mártirs que no dubdon en imitar á Gesu Cristo dic’o redamamiento d’a suya sangre. Reçaremos ta estar prestos en a desigéncia que o siguimiento d’o Evangélio nos demanda.

Mientres beluns s’encapinan, se disbraçan e s’altroixan sin vergüenyan, muitos de nusatros celebraremos a Victória d'o Espritu d’o nuestro Sinyor, simient que fa fruito en totas as nacions e en totas as puendas. Mesmo en a nuestra sociedat que tan lasa e vaciva á sovent nos pareix.

O património religioso encara

Fa muito que no escrivive sobre o património religioso aragonés retenito ilegalment en Catalunya. E no ye estato per falta de notícias ni, muito menos, perque o tema haiga dixato d’interesar-me. A raçon seria, més bien, que este ye un afer que, igual como ixas larguiças séries que aborreixen as tardis televisivas, puede recuperar-se dimpués de bels meses sin garra problema, tot contina como dinantes, como quan lo dixés. Como eixemplo, belunas d’as zagueras notícias á o respective:
A presidenta d’Aragon, Luisa Fernanda Rudi, ha asegurato que o Núncio d’A Suya Santidat en Espanya, Monsinyor Enzo Frattini, le ha feito saber o "critério clariço" d’la Ilésia de que os biens perteneixen á las parróquias aragonesas e ha fixato un plaço de nueu meses á un anyo t’a suya tornata.
Rudi, que se reunió a semana pasata en Madrid con o Núncio almite, que a Ilésia "no tiene elementos" ta fer valer estos reconeiximientos " encara que a propiedat aragonesa ye inqüestionable. Seguntes pareix, tamien o Bispe de Balbastro havrá una reunion luego con o Núncio.
Ademés, Rudi, se reunirá con o president d’a Generalidat de Catalunya, Artur Mas, ta "intercambiar opinions" sobre a tornata d’os biens perteneixients á las parróquias de l’Aragon oriental. Ya en o mes de juliol, en prener posesion d’o suyo cargo, escrivió Rudi una carta á Mas en a que le demandava dita reunion. A respuesta de Mas no ye arribata dica o 18 d’octubre. No pareix a catalana a millor d’as actituz, més que més, quan bi ha atros temas importants pendients.
Os alcaldes de Berbegal, Peralta d’Alcofea e Villanueva de Sigena tamien s’han entrevistato con a sinyora Rudi. Os juratos son salitos muitos satisfeitos d’a reunion, més que més, dimpués de coneixer as declaracions d’o Núncio.
Caldria recordar-les á Rudi e á os alcaldes que totas as decision d’o Vaticano son estatas favorables á Aragon, como quan en 2004 a Santa Siede refusó o recurso catalan sobre a propiedat, u como quan o 20 de septiembre de 2005 fiço publico un decreto que instava á tornar as pieças, u a senténcia firme de 2010 que reconeix a propiedat aragonesa. E caldria recordar-le á Rudi que ye o estato espanyol qui ha á fer cumplir ixas senténcias. Que vaiga charrando con Rajoy. Encara que a parola de Rajoy no valga res, como preva, per eixemplo, a facilidat con que cámbia de parixer en temas tan importants como l’alborto u a luita antiterrorista. Me creigo que, disgraciadament, dintro de muitos meses siguiré havendo á escrivir sobre este tema.

Son iguals

Son iguals. Fan a mesma vergüenya. Ascuitar ahiere a Rodríguez, a Pérez u a Rajoy. As suyas declaracions sobre a falsa fin d’a ETA. Son iguals, a mesma vergüenya fan. S’enganyavan os que se creyevan que o PP no tradicionaria a dignidat d’as victimas —a dignidat d’a Pátria. Veyer ahiere a Rajoy yera veyer a Pérez u a Rodríguez. Vergüenya. Carranya. Fástio. Pérez. Rajoy. Rodríguez. Son iguals. Son o mesmo. Son intercambiables. No votes. No t’enganyes. No te rindas.

Ye a hora d’a reaccion.

Un libro que caleva

Ye menister no olbidar-lo: quasi o 90% d’o clero d’a diocesis de Balbastro-Monçon −igual como muitos laicos d’a mesma− estió salvagement asesinato per os criminals partidários d’a criminal segunda r.i.p.ublica en a salvage persecucion religiosa de 1936 sin atro motivo que a suya fe catolica. Estianyo se fa, doncas, o 75 cabo d’anyo d’este martírio.
Como una d’as fitas d’a commemoracion d’estes feitos, cal acobaltar a publicacion d’a obra La persecución religiosa en la diócesis de Barbastro-Monzón (1931-1941) . O libro ye escrito per lo historiador don Martín Ibarra Benlloch e ye editato, en dos tomos, per a Fundación Teresa de Jesús e o Bispato de Balbastro-Monçon. En a ciudat de Balbastro ya ye estato presentato, en a de Monçon se presentará este 20 d’octubre.

Martín Ibarra ye doctor en História e autor de vários libros e publicacions sobre a matéria, entre os que descuellan obras como Los católicos de las diócesis de Huesca y Barbastro y las autoridades de la España Nacional (18-VII-1936/VII-1938). Ha tenito, ademés, l’asesoramiento d’a comision historica diocesana.
En as suyas 937 paginas, contiene o libro més de tres mil citas bibliograficas, decumentals e historicas; 4.000 fotografias; 700 transcripcions de cartas d’os mártirs; 4.200 decumentos; 1.800 notícias de revistas e periodicos; 1.200 certificatos e 230 entrevistas.
O libro abraca o periodo amugato entre os anyos 1931-1941 e ye trestallata en quatre partis: Segunda República, Revolución y Martirio, Rehacer la diócesis e Rehacer al pueblo fiel.
L’ogetivo d’a obra, d’un rigor historico e metodologico almirable, ye claro:

recordar con emoción a tantos hermanos en la fe que, con la gracia de Dios, fueron capaces de morir violentamente sin otro motivo que el de su condición de sacerdotes o católicos, y, lo que es más admirable, morir perdonando

como encertadament sinyala o bispe mosen Alfonso Milián Sorribas en o prelogo d’o libro.
Quede, pues, La persecución religiosa en la diócesis de Barbastro-Monzón (1931-1941) como un atro testimónio ta que no olbidemos a os nuestros germanos o bispe mártir Florentino Asensio, o beato Ceferino, os Seminaristas claretianos u os Escolápios de Peralta de la Sal e, cómo no, a toz os atros mártirs, tan gran ye o suyo numbro, que encara no son estatos puyatos t’os altars. Dios quiera que seiga luego.

Regina aragonensis

12 d'octubre. Fiesta d'a Virgen d'o Pilar. Patrona d'Aragon. Patrona d'a Guárdia Civil.
12 d'octubre. Fiesta Nacional d'Espanya. Festa Nacional d'Espanya. Festa Nacional de España. Espainiako Jai Nazionala. Hèsta Nacionau d'Espanha. Fiesta Nacional d'España. Festa nacional de Espanha. Fiesta Nacional de España.
12 d'octubre. Dia d'a Hispanidat.

Aliança de civilizacions

Per cada cinco menutos s'asesina un cristiano en o mundo a causa d'as suyas creyéncias. Més que més en os païses de mayoria musulmana, pero tamien en a Índia u en Corea d'o Norte, per citar-ne atros dos eixemplos.

De cabo quan, muito de cabo quan, os diários e os informativos de rádio u television nos ofreixen imágens d'o martírio d'os nuestros germanos coptos en Egipto.

Os que charravan d'a primavera arabe e s'emplenavan a boca tafalando d'a libertat que amanixeva en o mundo islamico no tarten mica quan veyen a carranya d'os cristianos egípcios que hana apedecar es suyos —es nuestros— germanos asesinatos per ixos guviernos que ivan a trayer a democrácia a Egipto, Túnez u, agora, a Líbia.

O guvierno de Rodríguez, que estrafolla millons e millons d'euros en o suyo progecto de l'aliança d'as civilizacions, zarra os uellos e a boca, os braços cruça, devant d'o genocídio. E lo fa perque nusatros, os cristianos d'Espanya, tamien zarramos os uellos e a boca, tamien os braços cruçamos.

Qui no quiera estar compliz, puede colaborar con a Ilésia. Ye fácil. Ye obligatório.

Quí fues inmigrant

Dende o 2009, bels 30.000 inmigrants son tornatos t’os suyos païses con l’aduya d’o guvierno espanyol (que ni ye guvierno ni, muito menos, ye espanyol, pero ixo seria matéria ta atra entrata). As aduyas no son garra fateça. Ademés, en bi ha tres modalidaz ta que os sinyors inmigrants en triguen a que més honra les faiga.

Asinas, pueden demandar que o guvierno espanyol les pague o billet d’avion e les dé, ademés, 450 euros ta os gastos d’o viage. Como lo guvierno espanyol fa muito que renunció á la esfensa d’as nuestras buegas, estoi que buenacosa d’os inmigrants que s’acullan á esta opcion tornaran ta Espanya decamin, dimpuesas de disfrutar d’unas vacáncias en casa suya con toz os gastos pagatos.

Atra d’as opcions que pueden trigar os sinyors inmigrants ye capitalizar o esquefere. En este caso, antes de viagear t’o suyo país, o guvierno espanyol les caixa o 40% d’o subsídio e, una vegata en casa, o 60% restant. De nuevas, e como lo guvierno espanyol fa muito que renunció á la esfensa d’as nuestras buegas, estoi que buenacosa d’os inmigrants que s’acullan á esta opcion tornaran ta Espanya decamin, dimpuesas d’haver malfurriato es nuestros diners en qualsiquier concieto.

Con tot, a opcion que més s’estiman os sinyors inmigrants ye a tornata productiva. Con esta modalidat, o guvierno espanyol da á o sinyor inmigrant 1.500 euros ta que amonte bel negócio en o suyo país. De nuevas, e como lo guvierno espanyol fa muito que renunció á la esfensa d’as nuestras buegas, estoi que buenacosa d’os inmigrants que s’acullan á esta opcion tornaran ta Espanya decamin, dimpuesas d’haver dixato bel familiar á cargo d’o negócio que han feito con os nuestros impuestos. Una vegata en Espanya, ya trobaran atras aduyas, que aquí nos sobran os dinerez.

Vacáncias subvencionatas, dreito á un subsídio d’esquefere á la carta, diners ta amontar un negócio an que més t’estimes… quí fues inmigrant e no un treballador autonomo espanyol sin vacáncias pagatas, sin un euro d’esquefere, sin garra aduya —ni sisquiera acceso a un credito— ta salvar un negócio real. Un negócio que da treballo encara e paga per cada dia més impuestos. Impuestos ta esto. E ta atras muitas cosas muito piors.

Cuentra o nacionalismo

B’ha dos maçadas sobre o nacionalismo que, per errónias, no solo no me fan mica goi sino que me pareixen periglosas de tot. Ta caramuello, son dos ideyas que se repiten de contino.

A primera ye ixe topico de que o nacionalismo ye una malotia que se cura viageando. Pos no, o nacionalismo no solo no se cura viageando, sino que no se cura ni sisquiera con a verdat. O nacionalista aragonés siguirá pensando que Aragon perdió a suya independéncia en 1711, encara que totas as fuents historicas le preven que a Guerra de Sucesion estió una guerra civil espanyola que enfrontinó á os partidários de dos aspirants á la Corona d’Espanya, e que en Aragon, como en tos os puestos, b’havió gent que luitó per os Áustrias e gent que luitó per os Borbons. Ixo rai, o nacionalista aragonés charrará de tropas foranas invadendo lo Reino e aragoneses luitando per a suya soberania. Igual como o nacionalista catalan, que toz os once de setiembre repite una mentira parellana sobre a mesma guerra.

Tot nacionalista nega la realidat perque se comporta como un adolescent que no sabe que menar-se per es suyos concietos. Yo tiengo dreito á... ye a suya frase favorita, e a suya inmatura voluntat ye a unica lei que respecta. Igual como lo jovençano que se crei que a el as drogas no le feran res, u que puede vulcar contenidors u cremar autos sin que o codigo penal le impose garra castigo, o nacionalista se piensa que él tiene toz os privilégios e ye per dencima de qualsiquier lei.

E ixo ye asinas perque o nacionalismo ye una grau patologia. Una patologia que ye fruito d’a crisis general que secute a nuestra sociedat dende que o liberalismo ha ito fendo pitanças toz os alacez d’a nuestra civilizacion. Quan as revolucions —burguesas u obreras— estricallon l’orden tradicional e nos impuson esta nueva sociedat refirmata sobre l’ódio entre os suyos components —a luita de clases—, toz os suyos esfuerços, tota la suya estratégia, s’han enfilato enta un unico ogetivo: fer disaparixer a organizacion natural d’os pueblos que se basava en l’amor a la Religion e a la Pátria. Como lo internacionalismo —esfendito per liberals u marxistas u anarquistas— no ha enradigato mica en o pueblo, ixas ideologias criminals huvon á inventar-sen a falsedat d’o nacionalismo como cuentrapunto á o natural patriotismo d’o ser humano. Per ixo e á la fin, o nacionalismo refleixa perfectament totas as misérias que acaramullan á lo bofo hombre moderno.

A segunda ideya sobre o nacionalismo que m’encarranya arrienda ye ixe atro topico que lo presenta como una conseqüéncia d’o centralismo. Tamien ye falsa. Si o nacionalismo naixés como reaccion á o poder d’os estatos tendria qualque virtut. Disgraciadament, no ye o caso. Ya hemos dito que o nacionalismo naix —sin atra raçon que subvertir l’orden natural— d’a man d’o liberalismo. E que marxistas u anarquistas —fillos d’os liberals toz os dos— lo fan servir ambute ta envilecer a sociedat.

Ademés, basta con fer una golladeta á la nuestra história recient ta veyer que ye con esta democrácia, e o suyo estato d’as autonomias, quan o problema deseparatista —inexistent dinantes d’as revolucions liberals d’o sieglo XIX— ye creixito dica fer-se un cáncer. Qué fuerça teneva o independentismo basco durant o franquismo? No pas guaire, no verdat? Pos agora mesmo guviernan a Diputacion de Guipúzcoa. O mesmo, u parellano, se puede decir d’o nacionalismo catalan, gallego, aragonés u canário.

Si l’eixemplo no convence, faigamos a golladeta ta part de Fráncia. Si o nacionalismo surtís como reaccion á o centralismo, en o estato més jacovino d’o mundo os nacionalistas havrian á estar legion. Justo lo contrário. Á penar d’as quantiosas subvencions d’a Generalidat catalana u o guvierno autonomo basco ni o nacionalismo catalan ni o basco —ni l’occitano u o breton u o corso— tienen mica representacion —ye decir, mica poder— en as suyas regions.

Nos feria honra no olbidar estes feitos. A trista realidat ye que en esta Espanya embrutecita an que vivimos, a unidat d’a Pátria ye menaçata seriosament per un enemigo muito perigloso. Me temo que cuentra o nacionalismo no se luita solo charrando de fueros regionals, se luita charrando d’Espanya. En toz os nuestros idiomas, prou que sí. Pero siempre Espanya.

Ensinyança concertata

Se’n charra arrienda estes dias. A mesma cancioneta siempre: una plaça escolar ye muito més barata n’a escuela concertata que n’a escuela publica. No sé si ye verdat. Quasi asegurarí que no. Seguntes me contan muitos amigos —os mios fillos van t’a escuela publica, e firme contentos que en somos, pero quasi totas as mias coneixéncias mandan á la suya mainada t’a concertata— en a escuela concertata no se fa sique pagar condutas per tot. Conque no tiengo guaire claro que a ensinyança concertata seiga prou més economica. Ni sisquiera me se da mica.

Yo naixié —e creixié— en un chiquet lugaron d’o Sobrarbe an que no b’heva escuela. Toz os dias me’n levavan en auto t’o colégio d’un atro lugar. Dimpués me’n levavan toz os dias en autobús t’o instituto de L’Aïnsa. Soi seguro de que a mia plaça escolar —igual como a d’es mios germanos, igual como a de tantos atros ninos de l’Aragon rural— ye estata siempre prou més cara que ixa mesma plaça en qualsiquier colégio d’a ciudat de Uesca u Zaragoça. Casualment, no b’ha garra centro concertato en tot o Sobrarbe. Se coneix que no ye negócio. Totas as escuelas, doncas, hi son publicas.

Perque o gran problema d’a escuela concertata ye justament ixe, que ye concertata. Asinas, a ensinyança religiosa ya quasi no existe en Espanya, agora ye ensinyança concertata. Una ensinyança que, en quasi toz os casos, no transmite pas a moral catolica. Ya no b’ha cleigos en as aulas, solo que profesors. Profesors que, en demasiatas ocasions, ensinyan una história d’Espanya acaramullata de mentiras. Profesors que, en demasiatas ocasions, ensinyan una envista de l’hombre, d’a família e d’a sociedat, aleixata de tot d’o Magistério d’a Ilésia. Profesors que, á la fin, en demasiatas ocasions, ni sisquiera son catolicos practicants sino tot o contrário.

Ricordemos qué oposicion fiçon os centros concertatos á la enatiça asignatura d’educacion t’a ciudadania. Ni brenca ni meya. Res. No seiga que perdamos o concierto. Veigamos en qué valors creyen os ninos, os jóvens, que rematan a suya educacion en os colégios concertatos. Hedonismo, relativismo e materialismo. Pero ixo rai. Mientres que no perdamos o concierto, toz contentos.

O problema d’es colégios concertatos espanyols ye que se pareixen á saber-lo á os nacionalistas catalans: solo les precupan que os suyos diners, solo buscan que o concierto economico.

Esfendo camin

Confieso a mia ignoráncia: defuera de Luisa Fernanda Rudi, no conoxeive —dica ahiere— o nombre de garra component d’o nuevo guvierno d’Aragon. Entre atras cosas, perque o guvierno naixito d’as esleccions de mayo encara no ha feito res ta mereixer o mio interés. E quasi ye millor que continen asinas, que como les dé per actuar, será mesmo pior.

Pero ahiere siento en a rádio que o consellero de facienda d’o guvierno d’Aragon ha presentato un diz que plan ta alcorçar o gasto publico. No criticaré ixe diz que plan, encara que no seiga que a bofa estrolicadera que gosa fer, per un regular, o nuestro politicamen. No, me centraré en o consellero. E no en o feito de que baladroneye de liberal —atros balloqueyan de marxistas con 300.000 euros en fundos d’inversion manullatos per os mercatos capitalistas; prou sabemos que o politicamen pátrio esfiende tota mena d’esclavitut laboral e qualsiquier privilégio economico—. No, hue charraré, u escriviré, sobre o pasato mosical d’o nuevo consellero. Perque, no sé si dinantes de fer-se liberal u mientres ya lo yera, o sinyor Garcés estió cantautor. Mesmo actuó en Nueva York con Labordeta. No sé si ixa u belatra d’as suyas actuacions mosicals estió subvencionata, pero sí sé, e de buenos corros, que l’agora consellero grabó un disco en aragonés. O disco, que pagó o Consello d’a Fabla Aragonesa, se clamava Fendo camín (1983) e yera malo. Malo que en pudiva. Talment b’haiga encara bella cinteta u bel vinilo a la venda per si belun quiere comprevar-lo. A cosa ye que o Consello d’a Fabla Aragonesa le paga un disco a o sinyor Mario, que se coneix que heva feito publico o suyo deseyo de grabar en a nuestra luenga, en unas envueltas en que a grabacion d'un LP, mira-tos cuántos discos se grabon en Aragon en 1983, yera tot un privilégio. Como lo disco no tiene mica exito —¿he dito ya que o disco yera malo, malo que en pudiva?— o sinyor Garcés s’adedicará a criticar d’espeso a os que hevan meso os diners e as ganas ta que el grabás a suya obra. No sé si ixos malos modos u ixe sentito d’a gratitut e de l’autocritica l’havrá aduyato en a suya, esta sí, exitosa carrera politica, pero me sansonio que prou.

Asinas que quan ahiere siento en a rádio que o consellero de facienda d’o guvierno d’Aragon, sinyor Garcés, ha presentato un diz que plan ta alcorçar o gasto publico, no puedo dixar de deseyar que tienga un poquet més de taliento t’as finanças d’o que demonstró t’as cancions. E millors modos que no demonstró altalle.

A estratégia d'o Mal (e 2)

Nos guvierna o Mal. Dende fa tiempo. E a sociedat trasca. Grácias a la propaganda d’os meyos de comunicacion. Grácias a la desafalbetizacion que esparden escuelas e universidaz. Grácias a la complicidat de toz os partitos, més que més d’os que nos fan creyer que son l’alternativa quan esfienden o mesmo programa.
Tot ixo ye verdat, pero tot ixo seria perdemés si amplos sectors d’a Ilésia no fuesen estatos empestatos per os enemigos d’a Tradicion.
Dende os anyos 60 d’o sieglo pasato, a saber-los mósens espanyols –igual como es de muitos atros païses– enverenon as concéncias d’os suyos feligreses fendo-les creyer que Gesu Cristo yera estato o primer marxista d’a história, que a doctrina social catolica consistiva en a luita de clases, que a litúrgia no yera que una lasa estrolicadera, que muitos dogmas no yeran que falórdias; que a Religion no yera que politica.
Estes traidors no solo emporquion a memória d’os Mártirs d’a nuestra Cruçata, sino que fiçon naixer en buena cosa d’a jovenalla espanyola as mesmas ideyas criminals que levon t’o martírio á decenas de mils de catolicos á mans d’a republica asesinadera. Sin bels parrocos post-conciliars, ni o marxismo ni o nacionalismo hesen tenito guaire eco en a nuestra Pátria. A trista realidat ye que, sin bels parrocos post-conciliars, o terrorismo d’ETA, os FRAP u os GRAPO no hes existito nunca.
Os repuis, os reús d’ixa endonímia encara traqueteyan; e prou que se manifeston fa bellas semanas -aá o canto d’anarquistas, marxistas, drogadictos e homosexuals- cuentra a visita d’o Santo Pair. Yera de dar: estió Ratzinger qui dixó clara a doctrina d’a Ilésia devant d’a mal clamata Teologia d’a Liberacion. Son els, os que dicen esfender a deseparacion d’a Religion e o estato, os que quison fer politica con a Fe d’os nuestros pairs: a politica de l’ódio, a politica d'o Mal.
Amonico, apleret, o pueblo catolico rectifica e torna t’a Verdat. Millor tardi que no nunca. Pero cal que toz ricordemos que o Mal nos guvierna perque nusatros le dixemos. E cal, e ye menister, que o Santo Pair no olbide pas que o relativismo que caracteriza o nuestro tiempo no ye que una d’as conseqüéncias d’ixe falso ecumenismo que quereva esborrar a doctrina esfendita per os Pairs d’a Ilésia dende l’emprencípio d’o Cristianismo.
Perque sin os valors absolutos d’a Fe verdadera, nos trobaremos de nuevas desarmatos devant d’o Mal. Ixe Mal que nos guvierna dende fa muito. Dende fa demasiato.

A estratégia d'o Mal

Nos guvierna o Mal. Dende fa tiempo. No solo dende que Rodríguez plegó en o poder. Dende fa 33 anyatas, si no més. Á lo menos, dende que un pueblo enganyato votó a constitucion que agora han reformato. Como si ixa reforma, si ixa constitucion, valés ta qualcosa.
Nos guvierna o Mal. Un Mal que quiere fer disaparixer tot o sagrato. Dende que un pueblo enganyato votás a constitucion de 1978, totas as leis que han ito aprevando os diferents guviernos no han tenito atro ogetivo que estricallar a família. Una vegata esborrata a família se puede esborrar qualsiquier cosa, dende a Pátria dic’a Religion, dende l’honor dic’o sentito comun.
Nos guvierna o Mal. E l’ha puesto fer perque siempre ha tenito a complicidat d’a dreita politica. A existéncia d‘a UCD, dinantes, e d’o PP, agora, solo ha servito que ta fer trascar, a buena cosa d‘os nuestros compatriotas, totas ixas midas enfilatas ent’a destruccion d’os valors tradicionals. Dende os periodicos e as rádios e as televisions e as peliclas. Dende as universidaz e as escuelas e os institutos. Toz os mensages que recibívanos e recibimos solo tenevan una intencion: dinamitar a família, alacet d’a sociedat.
Nos guvierna o Mal. Per qué no nos rebelamos? Quan o sistema vei que a gent ye amanata a esclatar fa servir as suyas estratégias. En primeras estió a UCD a que aprevó as primeras midas criminals mientres nos feva creyer que nos salvava d’a III republica. Dimpués estió o PP o que legitimó totas as politicas d’o PSOE mientres nos feva creyer que nos trayeva o bienestar economico e o patriotismo constitucional. Como agora ye imposible sustener a mentira e per cada dia menos gent vei á o PP como alternativa a o PSOE (“son toz iguals” ye a frase més repetita per es espanyols quan charramos de politica), o sistema ha creato lo 15 M. Aconsiguen asinas esbarrar a carranya d’una sociedat que empencipiava a veyer-bi a ruina moral en que o sistema nos ha enronato. Naix o 15 M e se fa creyer a la gent que a suya hora ye, a la fin, arribata. Cientos de mils de pairs de famílias e d’esqueferatos e de treballadors autonomos emplenan as carreras en manifestacions que demandan dignidat. Suénian con cambiar as cosas. Deseguida, o sistema mueve os suyos sicários, seqüestra o movimiento e lo fa aparixer como ye realment: una atra muestra de violéncia ultrazurdista. Os pairs de família e os esqueferatos e os treballadors autonomos pierden tota asperança e cayen de nuevas en l’apatia. Os repuis d’o 15 M empestan durant meses as plaças con a complicidat d’o sistema que los fiço naixer. “U o PP u o caos”, nos quieren fer creyer bels nuevos meyos de comunicacion que o suyo unico ogetivo ye refer a imagen d’o PP: o PP esfiende a vida,repiten en programas especials; ye en cuentra d’as unions homosexuals, soltan de cabo quan; ye un partito nacional que s’enfrontinará a os nacionalistas, pontifican en as suyas rufiertas; gestionará honradament e con estrúcias os recursos d’o Estato; meterá en trena a delinqüéncia e a inmigracion ilegal e bla, bla, bla. E o pueblo se lo creye perque fa 33 anayatas que dixó d’estar Pueblo ta no estar que Rabanyo.

JMJ

En realidat, no soi ito t’a JMJ. Yere en Madrid ixos dias e aproveité ta refitoliar una miqueta, ixo sí, pero no soi ito t’a JMJ e no feré un analís d’unas Jornatas que no vivié.

No fue t’a JMJ per várias raçons. Malament puede ir ta unas Jornatas Mundials d’a Jovenalla qui fa anyos que dixó deçaga a suya joventut. Ademés, e més que més, me fa muito fástio, esteticament, tot ixe ambient de guitarras e cancionetas. No puedo con ixas estrolicaderas bofas que més pareixen própias d’un telepedricador protestant que d’un propagandista catolico. Soi un antiguato, ya lo sé, pero me pareix quasi blasfémia, per eixemplo, fer servir cancions de Bob Dylan, e atras gents parellanas, en a nuestra litúrgia. Mesmo o més encerrinato esfensor d’o CVII me reconeixerá que a respuesta, amigos mios, ye en Cristo, no pas bufando en l’áire.

Pero yere en Madrid ixos dias e aproveité ta alparciar un poquet. Sin querer me trobé con a manifestacion anticatolica. Rostros esfeitos per l’ódio més irracional. Chilamentas salvages. Apatuscos movimientos infrahumanos. L’horror d’un mundo sin Cristo feito gentata. No yeran guaires, tamien ye verdat. No sé quí ha feito es calculos que fan plegar en 10.000 u 15.000 os asistents ta l’akelarre, me pareixion muitos menos; periglosos, pero muitos menos. Mesmo hi yera ixe reús humano que preside una asociacion laicista zaragoçana. Una clica, per cierto, que buenacosa de subvencions publicas replega e fa servir edifícios publicos, mesmo centros escolars, t’as suyas asambleyas. Qué terrible be d’estar devantar-se toz os maitinos con tota ixa rábia n’o cuerpo, pensé. Sigo reçando per els, més que més per l’homenot que los preside.

He dito que no feré un analís d’unas Jornatas que no vivié, ye cierto, pero no puedo dixar de fer mencion de dos trobatas que me en plenon de goyo e asperança: a liccion de Teologia que me dion uns pelegrins franceses, que ni os ventecino hevan feito, e a liccion de Fe que me dion uns pelegrins iraquins. Buscave yo bella colla de libaneses, ixos cristianos almirables que saben fer d’a milícia a suya vocacion, quan me trobé con ixos atros cristianos que viven a Fe en a més terrible d’as condicions. Qué dos mensages ta vivir con autenticidat o cristianismo.

Rogo á Dios que me faiga més humil.

De verano

De verano no tiengo ordenador, ni acceso á internet ni ganas de tener-ne. De verano torno t’o lugar. Me hi retrobo con paisages d’ensuénio, con os amigos de siempre me hi retrobo. Estianyo, con a crisis, mesmo con gent que feva anyatas que no veyeva. Gent que, estianyo, con a crisis, veraneyan de nuevas en a casa d’os pairs, en a casa d’os lolos veranyan de nuevas. De verano torno t’o lugar. Hi veigo qué he perdito, qué no recobraré nunca, encara que hi torno malas que puedo, encara que hi torne siempre. Per ixo no escrivo agora sobre Rudi u Biel, Pérez u Rajoy. Ni sisquiera sobre os asperançatos que emplenan as plaças de Madrit á penar de l’ódio criminal d’os anticatolicos. De verano no tiengo ordenador, ni acceso á internet ni ganas de tener-ne. De verano torno t’o lugar. Me hi retrobo con paisages d’ensuénio, con os amigos de siempre me hi retrobo. Hi veigo qué viello m’he feito. O que he perdito hi veigo. O que no recobraré nunca defuera d’o ricuerdo hi veigo. De verano.

L'alma e os diners

Yera de dar: a gent ye blincata ascape cuentra a primer mida que han preso as nuevas Cortes —que ta esto prou que s’han entendito decamin— e que ye una indemnización por cesantía ta os deputaus que rematen o suyo mandato e no tiengan emplego. Dita indemnizacion no ye garra estopéncia: 2.967 euros mensuals, que podran cobrar tantos meses como anyatas estuvon de parlamentários, dica un maximo de 18.

Prou que l’alcuerdo ye una vergüenya, més que més en metat d’esta crisis. Pero lo problema ye que esta crisis e esta —e atras muitas— desvergüenyas d’os nuestros caporals no son que a conseqüéncia natural d’a corrupción moral que empesta, dende fa decadas, a la sociedat espanyola.

Una nacion que asesina os suyos fillos antes que no naixcan e a ixe crimen lo clama dreito; u que declara matrimónio a union de dos hombres u dos mullers e les atorga o dreito a afillar una mainada, negando a ixos ninons o verdadero dreito, o dreito a una família; una nacion que permite que toz os suyos guviernos se refirmen en partitos que o suyo unico ogetivo ye esfer ixa nacion e que altroxen de contino —toz os dos: os guviernos e os partitos nacionalistas— a Espanya; una nacion, a la finitiva, que no tiene atra politica que no seiga que enrestir cuentra a Religion, a Família e a Pátria se mereix esto e muito més.

Gemecamos —perdemés— agora que nos furtan os diners. Deverinos d’haver-nos devantatos —prestos— quan emprencipion a furtar-nos l’alma.

E agora qué?

Ya han feito garras as nuevas Cortes e no tardará guaire a haver-bi un nuevo guvierno regional; pero, de veras en será de nuevo?

Dinantes tenévanos o PSOE-PAR. Agora tenemos o PP-PAR. Coneixendo a breu —pero infame— história de l’autonomia aragonesa, será o PAR, de nuevas, qui mene a situacion. Encara que —formalment— esta vegata no se fique en o egecutivo.

Per agora, ya tenemos a Biel de president d’as Cortes e dando liccions de cómo han a comportar-sen as suyas sinyorias. Dimpués, tendremos a os caporals d’o PAR en as Direccions Generals, que una cosa ye renunciar a dentrar en o guvierno e unatra renunciar a dentrar en os negócios. A la fin, e como siempre, los tendremos en os titolars d’a prensa, acusatos de tota mena de corrupcions que no se judgaran pas, que ta ixo bel fiscal ye d’a família. En zagueras, e tamien como siempre, no será o unico partito politico que i veigamos.

Si no pudisen tanto —fisicament e intelectual— me’n irí on os enrabiatos ixos. Ye a hora d‘a reaccion.

Diploma d’Especializacion en Filologia Aragonesa

O Campus de Uesca impartirá o nuevo Diploma d’Especializacion en Filologia Aragonesa antes con antes. O nuevo estúdio de postgrau, que ferá garras decamin, ye conseqüéncia

d’as nesecidaz formativas que naixen d’a Lei de Luenguas d’Aragon. En este sentito, o títol de postgrau d’a Universidat de Zaragoça mira de formar mayestros e profesors t’a ensinyança de l’aragonés, e ufrir a qualificacion “que facilite l’acceso ta puestos de treballo en l’alministracion, médios de comunicacion, institucions u progectos culturals”, seguntes aclarion os profesors José Domingo Dueñas e Francho Nagore, decano d’o centro uescano e director d’o nuevo estúdio respeutivament. O títol busca tamien proporcionar una ensinynça especializata á toz es que deseyen afundar en o coneiximiento de l’aragonés.

Talment seiga este zaguer aspeuto o més important si nos femos cargo d’a breu existéncia que se le devina á la Lei de Luengas.

Caldrá asperar e veyer como fa garras o progecto, pero ye de celebrar que a Universidat de Zaragoça emprencipíe á albandonar a balloquera ignoráncia e a enatiça incompeténcia con que, durant decadas, tracton, u millor dito dispricion, a riqueça lingüística d’a nuestra region.

Con tot, una colla de gent que se fan clamar Asociación Lengua Común han feito publica a suya precupacion perque a Universidat “se plegue á politicas d’imposicion lingüistica”.

Se’n olbidan estes sinyors de que ta que b’haiga una luenga comuna ha d’haver-bi-ne belatras més, e que ixas atras luengas tamien tienen os suyos dreitos, digo yo; 

ademés, que ta esfender o castellano, ciertament luenga comuna de toz nusatros, no b’ha que enrestir cuentra as atras luengas espanyolas. Charran tamien d’a salmódia ixa d’a perda d’as variedaz locals. E digo salmódia, perque els nunca no han amonstrato garra interés ni respeuto per lo património lingüistico aragonés, que parixen desconeixer de raso quan s’atriven á afirmar que a denominacion luenga aragonesa no ye mica correuta perque as diferiéncias dialeutals no fan posible a suya normalizacion.

Pero bueno, vaigamos t’a ensúndia e aladiemos as fateças, que a notícia nos en plena de goyo. Ye d’asperar que, á la fin, contemos con una buena ferramienta t’a recuperacion e dignificacion d’a nuestra luenga que forme profesionals con a qualificacion neseçária ta fer, en traças e como cal, o muito treballo que b’ha pendient.

Ye urgent.

Islándia e Hongria

Una entrata breu. Dos parolas tasament: Hongria, Islándia. E muita invídia. Per diferents raçons, pero muita invídia.

Quí vivís en un país que a suya Carta Magna reconeix o Cristianimo como fuent primigénia d’as valuras nacionals.

Quí vivís en un país que judga á o suyo ex-primer ministro per haver menato a nacion t’a ruina.

Pero vivimos en Espanya. Una Espanya irreconeixible an que carranya ye sinonimo de vasuera. Una Espanya que nega as suyas radices, que as suyas feitas oblida. Una Espanya que se podreix porquiça en as plaças e n'as Cortes.

Ye a hora d’a reaccion.

O nuevo guvierno, a lei de luengas e l'académia

Pareix que una d'as conseqüéncias d'o previsible guvierno PP-PAR será a derogacion d'a lei de luengas e tot o que ella trayeva, académias incluyitas. Ye o que pasa quan s'apreva una lei sin consenso, no ya n'as Cortes, que ixo ye menos important, sino n'a sociedat, que ixo ye o grau.

Me deciva ahiere un amigo, partidário d'a CHA o pobrichon, que talment as nuevas Cortes respecten e mantiengan a lei, que dinantes os mesmos partitos no fiçon retacular a ensinyança d'o catalan en as comarcas orientals. No lo veigo probable. Ye verdat que o PP(SOE) ye especialista en trascar, remugar e fer que a gent accepte as iniciativas que o (PP)SOE apreva, pero no pareix este o caso.

O PAR no puede permitir-se una nueva escision e as demandas d'inconstucionalidat que os suyos concellos han empetato dixa muito claro quál ye o sentir d'a suya militáncia. Per lo que fa á o PP, á ixos no se les da mica a opinion d'os suyos militants, cierto, e podrian tradicionar-los una atra vegata como ya han feito en muitas ocasions; pero agora bi ye UPyD, que ha millorato prou os suyos reultatos, e UPyD ha feito bandera d'a derogacion d'a lei de luengas. O PP sabe que UPyD puede siguir sacando-le votos e a perda de votos sí que se le da arrienda á o PP. Ya lo hemos visto en Catalunya, si PXC puya, o PP fa agora d'o control d'a inmigracion l'axe d'a suya campanya, sin meter-sen royos per as suyas anteriors politicas de papels ta toz, mesmo ta's criminals.

L'actual lei de luengas yera mala, muito mala, cierto, pero lo nuevo guvierno no'n ferá una millor: o nuevo guvierno no ferá garra politica lingüistica; e a gent ni tartiran. Ixo ye o grau.

Gana o PPSOE

Gana o PPSOE. Concretament, a branca pepera d’o PPSOE. Una branca que a suya unica raçon d’existéncia ye justificar, de contino, totas as bestieças que l’atra branca, a psoecialista, fa un dia á l’arreu de la otro. O crimen de l’alborto, per eixemplo. Qué fástio feva veyer en as zagueras mobilizacions pro-vida á o enatiço sanselon que repetiva que a nueva lei no feva mica falta, que yera una lei sin consenso, mientres que l’anterior solucionava raçonablement tos es casos. Tan raçonablement que durant as ueito anyadas de guviernos populars s’asesinon á més de 500.000 innocents perque fevan estorbo. U a qüestion nacional, per nombrar atro tema que a gent se piensan que distingue á es dos integrants d’o regimen, que agora Andalucia ye nacion seguntes quaterna ixa reforma d'o estatuto que de buen implaz refirmó Arenas & Co.

Gana o PPSOE. O sistema funciona con eficiéncia. Encara que os pobrichons que ocupan as plaças publicas pareixcan no saber-lo, no quieran creyer-lo. Funciona tan bien que ya ha mirato un recámbio per si nunca o PSOE esclatás, per si nunca o PP esbotás. Ve-te-me UpyD. Tot ye controlato. O capitalismo, “president no rebles, no te’n vaigas”, se’n la risiqueta satisfeito.

Gana o PPSOE. Perdemos toz.

Aragon pude e a justícia calla.

Diz que una imagen ye millor que milenta parolas, conto que tot un reportage muito més; asinas que meto contino bel par de viclos ta veyer-bi o programa que sobre a corrupcion en Aragon emitió Intereconomía Televisión lo sabado pasato. Prou que ye parcial, en toz os sentitos d'o vocable, pero no dixar d'estar recomendable. Se bi enampla bellas informacions que ya quaterné en atra entrata d'a bitacora e se hi sinyala bellas relacions personals que explican o siléncio que acubilla buena cosa d'a delinqüéncia politica aragonesa.

Primer parti.
Segunda parti.

Académia

Tristeça. As informacions que, dende feva semanas, garinvoliavan per lo rete yeran ciertas. O Consello Superior d’as Luengas d’Aragon ha feito publica a suya lista con os primers nueu academicos de l’aragonés. Se hi troba á faltar bels nombres, bels nombres que uno creyeve imprescindibles. Ademés, e ixo ye o pior, se’n hi troba á sobrar belatros; belatros nombres sin guaire livel, sin mica prestígio. Academicos, estes zaguers, que nunca no feran una conferéncia en garra universidat; como muito, qualque charradeta en a semana cultural de bel colégio.

Igual se tiene. A Lei de luengas s’aprevó ta fer d’o catalan una luenga própia d’Aragon. L’Académia d’a Luenga Aragonesa solo naix que como coartada ta crear una Académia Aragonesa d’o Catalan que faiga posible a desaparicion de buenacosa d’o nuestro património cultural. L’aragonés —a més menaçata d’as luengas menaçatas, a més chiqueta d’as luengas chiquetas— no ye estato que o cavallo de Troya ta que o nacionalismo catalan pille vencida en casa nuestra. Feito ya o suyo papel, os nuestros caporals pueden dixar-lo disaparixer albandonando-lo en mans apatuscas, en esparlaticatas bocas. No ye una qüestion lingüística, ye una qüestion politica. Tristeça. Muita tristeça.

Aragon pude

No b’ha que fer un estúdio sociologico, u qualcosa parellana, ta saber que quasi tota la gent tiene muito claro que a corrupcion politica ye, tamien en Aragon, general de tot. Quasi toz tenemos muito claro que esta pasa ye present en toz os partitos –de zurdas u dreitas, grans u chiquez- e en totas as almenistracions –local e comarcal, provincial e regional-.
Solo que con os casos que a prensa aragonesa ye publicando en os zaguers dias, e que ye de dar que no seran que a tuca d’o iceberg, se podria emplenar un libro:
-A neseçária complicidat d’a DGA en l’aprevacion d’o PGOU d’A Muela.
-As comisions -més de 500.000 euros!- que diz que cobró o sinyor vicepresident Biel per aligenciar dito plan d’ordenacion.
-As imputacions judicials á funcionários d’a DGA, emprencipiando per lo director d’o Servício Provincial d’Indústria, per delictos de prevaricacion, cofeito, negociacions prohibitas e falsedat decumental.
-As aljudicacions irregulars que o guvierno d’Aragon ha feito -á lo menos, que ni sisquiera s’han revisato totas as contrataccions- en 35 obras en diferents lugars d’a region.
-As comisions que -ya sabez: presuntament- cobrava un sinyor d’o PAR, Antonio Quero, que se feva clamar Mister 3%
-As comisions que, seguntes ixe cargo d’o PAR, cobró o o sinyor Carlos Escó -marito d’a candidata socialista á o guvierno d’Aragon e amigo amiguiço de Marcelino Iglesias- quan yera viceconsellero d’Obras Publicas. Cargo que dixaria, ta pasar ta Telefónica, quan as denúncias sobre a honradez de muitas d’as suyas gestions se fiçon ixordaderas de tot.
-A imputacion á José Sobrino, marito d’a candidata d’o PP aragonés, Luisa Fernanda Rudi, per insolvéncia punible. Os treballadors l’acumulan de fer crepar a suya empresa meyant vendas con perdas e amagadas de benefícios.
-O concello de Mallen, an que agora mesmo a policia bi ye investigando un atro caso de corrupcion monecipal: pago d'actuacions que nunca no se fiçon, presuntas irregularidaz en a tramitacion d'expedients d'aljudicacion de contratas e bels, siempre probables, pilotaços relacionatos con a promocion d'a polemica plataforma logistica de Mallen. Tot per valura de cientos de mils d'euros.
Ecetra, ecetra, ecetra.
Pero ixorronta més que més que buena cosa de gent pareix aconortar-se, pareix fer-se-ie. Como si no’n b’hes de solucion, como si a corrupcion fues un pecato an que toz hi cayerinos si nos trobásenos en bel puesto de responsabilidat. A malotia social que o sistema ha aconseguito ye tal que trascamos de buen implaz con a inmoralidat més esclatera sin ni sisquiera un sinyalin de corage.
Prou sabemos qui ganará as esleccions d’o dia 22; prou sabemos qui las perderemos.